ایس ڈی پی آئی ماہرین کی بجٹ پر کڑی نظر: آئی ایم ایف کی شرائط محور، سماجی تحفظ، موسمیاتی اہداف اور اقتصادی استحکام کو خطرات لاحق

اسلام آباد (15جون 2025): پائیدار ترقیاتی پالیسی ادارہ (SDPI) کے ماہرین نے بجٹ 2025-26 پر بعد از بجٹ میڈیا بریفنگ میں کہا ہے کہ وفاقی بجٹ میں شامل اقدامات سے ملک کی معاشی استحکام، قرضوں کی ادائیگی، موسمیاتی اہداف اور سماجی تحفظ کو شدید خدشات لاحق ہو سکتے ہیں۔
ایس ڈی پی آئی کے زیر اہتمام اس میڈیا بریفنگ میں ادارے کے ایگزیکٹو ڈائریکٹر ڈاکٹر عابد قیوم سلہری نے کہا کہ پاکستان اس وقت شدید مالی دباؤ کا شکار ہے اور حکومت کے پاس صرف 11 کھرب روپے کی محدود گنجائش ہے، جبکہ قرضوں کی ادائیگی اور دفاعی ضروریات میں اضافہ ہوتا جا رہا ہے۔ انہوں نے کہا:
"بھارت کا 80 ارب ڈالر کا دفاعی بجٹ پاکستان کے 7 ارب ڈالر کے بجٹ کے مقابلے میں بہت بڑا ہے۔ حالیہ پاک-بھارت کشیدگی کے تناظر میں دفاعی اخراجات میں اضافہ مجبوری بن چکا ہے، لیکن اس کا خمیازہ ترقیاتی اخراجات کو بھگتنا پڑے گا۔”
ڈاکٹر سلہری نے بجٹ میں دی گئی ٹیکس پالیسی، خاص طور پر شمسی توانائی کے آلات پر 18 فیصد جی ایس ٹی کو پاکستان کے موسمیاتی اہداف کے خلاف قرار دیا۔ انہوں نے کہا کہ یہ فیصلہ پاکستان کی NDCs، کاربن لیوی اور عالمی وعدوں کے منافی ہے۔
انہوں نے مزید کہا کہ پنشن اخراجات میں اضافہ اور ترقیاتی بجٹ میں کٹوتی واضح ہے، جب کہ ڈیمز کے لیے مختص فنڈز میں کوئی خاص تبدیلی نہیں آئی، حالانکہ سندھ طاس معاہدہ معطل ہو چکا ہے۔ انہوں نے زور دیا کہ "پانی کو دفاع کے برابر اہمیت دی جانی چاہیے۔”
ایس ڈی پی آئی کے ڈپٹی ایگزیکٹو ڈائریکٹر ڈاکٹر ساجد امین جاوید نے کہا کہ بجٹ کا فوکس واضح طور پر آئی ایم ایف کی اگلی قسط کے لیے شرائط کی تکمیل پر ہے، نہ کہ معاشی اصلاحات یا طویل مدتی ترقیاتی اہداف پر۔
انہوں نے کہا: "600 ارب روپے کے نئے بالواسطہ ٹیکس، مہنگائی کی بلند سطح، اور تنخواہ دار طبقے پر بوجھ، جبکہ بڑے کاروباری شعبوں کو چھوٹ دی گئی ہے۔”
انہوں نے کہا کہ متوقع شرح نمو 4.2 فیصد رکھی گئی ہے، مگر زمینی حقائق کے مطابق یہ 3.5 سے 3.7 فیصد کے درمیان رہنے کا امکان ہے، خاص طور پر ایران-اسرائیل تنازعہ اور تیل کی قیمتوں میں ممکنہ اضافے کی وجہ سے۔ انہوں نے زرعی شعبے کو نظر انداز کیے جانے پر بھی تشویش کا اظہار کیا۔
ڈاکٹر شفقات منیر، ڈپٹی ایگزیکٹو ڈائریکٹر ایس ڈی پی آئی، نے کہا کہ بجٹ کٹھن حالات میں بنایا گیا ہے۔ انہوں نے 6 فیصد موسمیاتی اخراجات اور 8.6 فیصد ترقیاتی فنڈنگ کو موسمیاتی موافقت کے لیے مختص کرنے کو خوش آئند قرار دیا، مگر شمسی پینلز پر جی ایس ٹی اور کاربن لیوی کے نفاذ کو متضاد پالیسی قرار دیا۔
انہوں نے عالمی سطح پر انسانی امداد میں کمی کی نشاندہی کرتے ہوئے پاکستان میں پیشگی تیاری اور آفات سے بچاؤ میں سرمایہ کاری پر زور دیا۔ انہوں نے کسانوں کے لیے 100,000 روپے فی کسان قرض کو ناکافی قرار دیا اور کپاس کی پیداوار میں مسلسل کمی اور مزدوروں کے حقوق کو بجٹ میں نظر انداز کیے جانے پر تشویش ظاہر کی۔

ایس ڈی پی آئی کی ریسرچ فیلو ڈاکٹر فریحہ ارمغاں نے کہا کہ تعلیم کے شعبے کے لیے بجٹ کا صرف 1 فیصد مختص کیا گیا ہے جبکہ مزدوروں کے مسائل کا ذکر تک نہیں۔ انہوں نے کہا: "یہ بجٹ صنعتی محنت کش طبقے کو نظرانداز کرتا ہے۔”

اگرچہ بجٹ پر تنقید کی گئی، لیکن سماجی تحفظ کے لیے 716 ارب روپے کی ریکارڈ رقم مختص کی گئی ہے، جو گزشتہ سال کی نسبت 21 فیصد زیادہ ہے۔ ڈاکٹر فریحہ نے اسے آئی ایم ایف کی پسندیدہ شعبہ بندی اور موسمیاتی موافقت کا متبادل قرار دیا اور بجٹ میں صنفی حساس منصوبہ بندی کی جھلک کو مثبت پیش رفت قرار دیا۔

ڈاکٹر خالد ولید، ریسرچ فیلو، نے واپڈا کے ہائیڈل منصوبوں کے بجٹ میں 27 فیصد کمی، اور بلوچستان کے شمسی ٹیوب ویلز کے لیے سبسڈی میں 57 فیصد کٹوتی پر تشویش ظاہر کی۔ انہوں نے کوئلے سے چلنے والے پاور پلانٹس کی آمدن پر زیرو ٹیکس کو پاکستان کی توانائی منتقلی کے لیے خطرناک قرار دیا۔

انہوں نے کہا کہ "بڑھتی توانائی قیمتوں کے باوجود شمسی پینلز کی اپنانے کی حوصلہ افزائی نہیں کی جا رہی۔ حکومت مقامی اسمبلنگ کو فروغ دینے کے نام پر درآمدی پالیسی محدود کر رہی ہے، جب کہ چینی ساختہ سستے پینلز جنوبی ایشیا میں دستیاب ہیں۔”

میڈیا کے سوالات کے جواب میں ایس ڈی پی آئی ماہرین نے تسلیم کیا کہ بجٹ میں استحکام اور ریلیف کا توازن قائم کرنے کی کوشش کی گئی ہے، مگر یہ تضادات، قلیل مدتی سوچ اور شعبہ جاتی عدم توازن کا شکار ہے۔
انہوں نے کہا کہ حکومت کو مجوزہ اقدامات کے لیے بڑے پیمانے پر قرضوں پر انحصار کرنا پڑے گا، جو مالیاتی استحکام اور قرضوں کی پائیداری کے بارے میں مزید سوالات اٹھاتا ہے۔ ماہرین نے اس امر پر زور دیا کہ زرعی، تعلیمی اور مزدور شعبوں کو ترجیح دیے بغیر بجٹ کی منظوری پر نظر ثانی ضروری ہے۔