پی اے ایف کی آر آئی اے ٹی 2025 میں شاندار دوہری کامیابی

راولپنڈی، :
پاکستان ایئر فورس (پی اے ایف) نے برطانیہ میں منعقدہ عالمی شہرت یافتہ رائل انٹرنیشنل ایئر ٹیٹو (RIAT) 2025 میں دنیا کی صف اول کی فضائی افواج کے درمیان دو اعلیٰ ترین ٹرافیاں جیت کر ایک شاندار کارنامہ سرانجام دیا۔

انٹر سروسز پبلک ریلیشنز (آئی ایس پی آر) کی جانب سے ہفتہ کو جاری کردہ اعلامیے کے مطابق، ایئر چیفس کانفرنس کے دوران پی اے ایف کی پیشہ ورانہ مہارت اور طیاروں کی دلکش پینٹ اسکیمز کو عالمی فضائی افواج کے سربراہان نے خوب سراہا۔

ایئر چیف مارشل ظہیر احمد بابر سدھو نے اس نمایاں کامیابی پر پی اے ایف کے دستے کو مبارکباد دیتے ہوئے کہا کہ "قومی پرچم کو بلند رکھنا ہمیشہ سے پاکستان ایئر فورس کا نصب العین رہا ہے۔” انہوں نے کہا کہ ان اعزازات کا حصول پی اے ایف کی پیشہ ورانہ قابلیت، تکنیکی مہارت اور عمدگی کے حصول کی انتھک کوششوں کا مظہر ہے۔

پی اے ایف کے جدید ترین جے ایف-17 تھنڈر بلاک III طیارے، جس نے اس شو میں پہلی بار شرکت کی، کو "اسپرٹ آف دی میٹ” ٹرافی سے نوازا گیا، جو اس طیارے کو دی جاتی ہے جو ایئر شو کی روح، جذبے اور جوش کو بہترین انداز میں پیش کرتا ہے۔ یہ ٹرافی جے ایف-17 پروگرام کی ٹیکنالوجی میں مہارت اور آپریشنل صلاحیتوں کو ظاہر کرتی ہے، اور پاکستان کی بڑھتی ہوئی ایرو اسپیس صلاحیتوں کو عالمی سطح پر اجاگر کرتی ہے۔

اسی فخر کے لمحے میں، پی اے ایف کے سی-130 ایچ ہرکولیس طیارے نے، جو "آئیز ان دی اسکائیز” کے سالانہ تھیم سے مزین خاص تخلیقی لایوری کے ساتھ پیش کیا گیا تھا، "کنکورز ڈی ایلیگینس” ٹرافی حاصل کی، جو شو میں بہترین دیکھ بھال اور خوبصورت طیارے کو دی جاتی ہے۔

پی اے ایف اس سے قبل بھی 2006، 2016 اور 2018 میں رائل انٹرنیشنل ایئر ٹیٹو میں کئی اعزازات جیت چکی ہے، جس سے اس کی عالمی معیار کی فضائی افواج میں بلند ساکھ اور مسلسل فضائی برتری کا مظاہرہ ہوتا ہے۔

ریاٹ 2025 میں پی اے ایف کی شاندار کارکردگی نہ صرف عالمی سطح پر اس کی مقام کو مستحکم کرتی ہے بلکہ پوری پاکستانی قوم کے لیے باعثِ فخر ہے۔