شارجہ میں سہ فریقی کرکٹ معرکہ: پاکستان، افغانستان اور یو اے ای کے درمیان ٹی20 سیریز کا شیڈول جاری

اسلام آباد – سید محمد یاسین ہاشمی:
پاکستان کرکٹ بورڈ (پی سی بی) نے پاکستان، افغانستان اور متحدہ عرب امارات کے درمیان مجوزہ سہ فریقی ٹی20 سیریز کا مکمل شیڈول جاری کر دیا ہے۔ یہ سنسنی خیز ٹورنامنٹ شارجہ کرکٹ اسٹیڈیم میں 29 اگست سے 7 ستمبر 2025 تک کھیلا جائے گا، جسے ایشیا کپ 2025 سے پہلے ایک اہم وارم اپ ایونٹ کے طور پر دیکھا جا رہا ہے۔

تمام میچز رات 7 بجے (مقامی وقت) شروع ہوں گے اور فلڈ لائٹس کی روشنی میں شائقین کو زبردست مقابلے دیکھنے کو ملیں گے۔

اس سیریز میں اہم تبدیلی یہ ہوئی کہ ابتدائی طور پر پاکستان اور افغانستان کے درمیان دو طرفہ ٹی20 سیریز طے تھی، مگر بعد ازاں پی سی بی نے اسے سہ فریقی ٹورنامنٹ میں تبدیل کرنے کی تجویز دی، تاکہ کھلاڑیوں کو مزید سخت اور متنوع مقابلوں کا تجربہ حاصل ہو اور ایشیا کپ سے قبل ٹیمیں مکمل ہم آہنگی کے ساتھ میدان میں اتریں۔

سیریز کے دوران تینوں ٹیموں کی کارکردگی نہ صرف ایشیا کپ بلکہ آنے والے ورلڈ ٹی20 مقابلوں کے لیے بھی اہم اشارے فراہم کرے گی، جہاں ٹیمیں اپنی تیاریوں اور کمزوریوں کا بخوبی جائزہ لے سکیں گی۔

اس سہ فریقی سیریز کی میزبانی سے متحدہ عرب امارات ایک بار پھر خطے کی کرکٹ سرگرمیوں کا مرکز بننے جا رہا ہے، جبکہ شائقین کو بھرپور جوش و خروش سے بھرے مقابلے دیکھنے کا موقع ملے گا۔