اورکزئی حملے میں ملوث 30 خارجی اپنے انجام کو پہنچا دیےگئے۔
پاک فوج کے شعبہ تعلقات عامہ آئی ایس پی آر کے مطابق اورکزئی واقعے میں ملوث دہشت گردوں کے خلاف سلسلہ وار جوابی آپریشنز جاری ہیں، انٹیلی جنس کی بنیاد پر اورکزئی کے علاقے جمال مایہ میں آپریشن کیا گیا، فائرنگ کے تبادلے میں 30 بھارتی سرپرستی یافتہ خوارج کو جہنم واصل کردیا گیا۔
آئی ایس پی آر کے مطابق کامیاب آپریشنز دہشت گردوں کے ناپاک حملے کا بدلہ ہیں، آپریشنز میں دہشتگردوں کے مرکزی سہولت کاروں کو انجام تک پہنچایا گیا۔
شعبہ تعلقات عامہ کا بتانا ہے کہ علاقے میں مزید دہشت گردوں کی تلاش اور خاتمے کے لیے کلیئرنس آپریشن جاری ہے، پاک فوج بھارتی سرپرستی یافتہ دہشت گردی کے مکمل خاتمے کے لیے پرعزم اور ثابت قدم ہے۔
یاد رہے کہ 2 روز قبل اورکزئی میں سکیورٹی فورسز کے آپریشن کے دوران لیفٹیننٹ کرنل اور سیکنڈ ان کمانڈ میجر سمیت 11 جوان شہید ہوگئے تھے جب کہ فورسز کی جوابی کارروائی میں 19 خوارج مارے گئے۔
پاک فوج کے شعبہ تعلقات عامہ (آئی ایس پی آر) کے مطابق انٹیلیجنس بیسڈ آپریشن 7 اور 8 اکتوبر کی درمیانی شب کیا گیا، آپریشن کے دوران 11 بہادر جوانوں نے جام شہادت نوش کیا۔
آئی ایس پی آر کے مطابق انٹیلی جنس بیسڈ کارروائی بھارتی پراکسی فتنۃ الخوارج کے ٹھکانے پر کی گئی، اس دوران فورسز نے مؤثر کارروائی میں 19 بھارتی سرپرست خوارج ہلاک کیے۔
آئی ایس پی آر نے بتایا کہ لیفٹیننٹ کرنل جنید طارق فرنٹ سے ٹیم کی قیادت کررہے تھے، سیکنڈ ان کمانڈ میجر طیب راحت نے بھی جام شہادت نوش کیا۔
