شکیلہ جلیل
برطانیہ میں 25 فروری 2026 سے نئے سفری اور امیگریشن قواعد نافذ ہو رہے ہیں جن کے تحت دوہری شہریت رکھنے والے افراد کو بھی ملک میں داخلے کے لیے درست برطانوی پاسپورٹ یا متعلقہ دستاویزات ہمراہ رکھنا لازمی ہوگا، بصورت دیگر انہیں بورڈنگ یا داخلے سے روکا جا سکتا ہے۔
نئے قوانین کے مطابق ایسے مسافر جن کے پاس برطانوی پاسپورٹ موجود نہیں ہوگا، انہیں برطانیہ میں داخلے کے لیے ویزا، الیکٹرانک ٹریول آتھرائزیشن (ETA) یا سرٹیفکیٹ آف اینٹائٹلمنٹ (حقِ استحقاق کی دستاویز) پیش کرنا ہوگی۔ دستاویزات مکمل نہ ہونے کی صورت میں مسافروں کو فلائٹ، فیری یا ٹرین پر سوار ہونے سے بھی روکا جا سکتا ہے۔
85 ممالک کے شہریوں کے لیے بھی ETA لازمی
حکومت کے مطابق امریکا، کینیڈا اور فرانس سمیت 85 ممالک کے شہری، جنہیں پہلے ویزا فری سفر کی سہولت حاصل تھی، اب 25 فروری 2026 سے بغیر الیکٹرانک ٹریول آتھرائزیشن (ETA) کے برطانیہ کا سفر نہیں کر سکیں گے۔ یہ شرط ان مسافروں پر بھی لاگو ہوگی جو کنیکٹنگ فلائٹس کے ذریعے برطانیہ پہنچتے ہیں اور پاسپورٹ کنٹرول سے گزرتے ہیں۔
امیگریشن نظام کی ڈیجیٹلائزیشن کی جانب قدم
برطانوی حکومت کا کہنا ہے کہ یہ اقدام امیگریشن سسٹم کو مکمل طور پر ڈیجیٹل بنانے کی حکمت عملی کا حصہ ہے، جس سے مستقبل میں سرحدوں پر کنٹیکٹ لیس اور تیز رفتار آمد و رفت ممکن ہوگی۔
اکتوبر 2023 میں ETA کے آغاز کے بعد اب تک ایک کروڑ 33 لاکھ سے زائد مسافر کامیابی سے درخواست دے چکے ہیں۔ حکام کے مطابق یہ نظام سرحدی سیکیورٹی کو بہتر بنانے کے ساتھ ساتھ مسافروں کے لیے زیادہ ہموار سفری تجربہ فراہم کرے گا۔
برطانیہ کے وزیر برائے ہجرت و شہریت Mike Tapp نے کہا ہے کہ ETA حکومت کو ایسے افراد کی بروقت نشاندہی اور روک تھام میں مدد دیتا ہے جو ملک کے لیے خطرہ بن سکتے ہیں، جبکہ اس سے امیگریشن کا جامع ڈیجیٹل ریکارڈ بھی میسر آتا ہے۔
درخواست کا طریقہ اور فیس
ETA کے لیے درخواست سرکاری ‘UK ETA’ موبائل ایپ کے ذریعے دی جا سکتی ہے۔ درخواست فیس 16 پاؤنڈ مقرر کی گئی ہے۔ زیادہ تر درخواستوں پر چند منٹوں میں خودکار فیصلہ آجاتا ہے، تاہم بعض کیسز میں اضافی جانچ پڑتال کے لیے تین کاری دن لگ سکتے ہیں۔
دوہری شہریت رکھنے والوں کے لیے ہدایت
برطانوی اور آئرش شہری ETA سے مستثنیٰ ہیں، تاہم حکومت نے دوہری برطانوی شہریت رکھنے والوں کو سختی سے ہدایت کی ہے کہ وہ 25 فروری 2026 کے بعد سفر کرتے وقت اپنا درست برطانوی پاسپورٹ یا سرٹیفکیٹ آف اینٹائٹلمنٹ ہمراہ رکھیں، تاکہ بورڈنگ میں رکاوٹ یا تاخیر سے بچا جا سکے۔
وزارت داخلہ کے مطابق اکتوبر 2024 سے دوہری شہریت رکھنے والوں کو ان تبدیلیوں سے آگاہ کیا جا رہا ہے اور 2023 سے ETA نظام کے بارے میں باقاعدہ تشہیر کی جا رہی ہے۔
