’رات بھر نیند نہیں آتی ‘ 5 دہائیوں پر محیط کامیاب کیرئیر کے باوجود امیتابھ بچن پریشان کیوں؟
بالی وڈ کے بے تاج بادشاہ بگ بی امیتابھ بچن نے کام کے دباؤ کی وجہ سے اس عمر میں بھی راتوں کو نیند سے اٹھ جانے حتیٰ کہ متعدد مرتبہ رات بھر جاگنے کا انکشاف کیا ہے۔
بھارتی میڈیا کے مطابق امیتابھ بچن 5 دہائیوں پر محیط کامیاب کیرئیر کے باوجود آج بھی کام کی وجہ سے دباؤ کا شکار ہیں۔
83 سالہ امیتابھ بچن نے ایک بلاگ پوسٹ میں اپنے مصروف شیڈول کے حوالے سے بات کرتے ہوئے لکھا کہ’ کام کی وجہ سے رات کو سو نہیں پاتا، کام کرنے کے کچھ وقت بعد ہی یہ محسوس کرتا ہوں کہ اس سے بھی اچھا کرسکتا تھا، اجازت ملتی ہے تو دوبارہ بھی کرلیتا ہوں لیکن معلوم نہیں کہ یہ پہلے سے بہتر ہوا ہے یا نہیں،جو لوگ میرے کام کو دیکھتے ہیں وہی بتا سکتے ہیں لیکن یہی خیالات مجھے رات بھر سونے نہیں دیتے‘۔
امیتابھ بچن نے اپنے بلاگ میں لکھا کہ کئی مرتبہ پوری رات گزر جاتی ہے لیکن نیند نہیں آتی، ڈاکٹر ہمیشہ کم از کم 7 گھنٹے کی نیند لینے کا مشورہ دیتے ہیں لیکن ان کے لیے کام کئی مرتبہ نیند سے بھی زیادہ اہم بن جاتا ہے۔
سینئر اداکار نے مزید لکھا کہ ’24 گھنٹوں کے دوران بہت کام کرنا ہے، اس لیے ایک دن کو 36 گھنٹوں تک بڑھا دینا چاہیے اور زندگی کا فلسفہ کہتا ہے کہ جب ایسا ہو تو اسے 48 گھنٹے بڑھانے کو کہا جائے گا لیکن ہاں! بہت سی چیزیں سکیھنے اور کرنے کیلئے ہیں۔
میڈیا رپورٹس کے مطابق امیتابھ بچن اس وقت مختلف پروجیکٹس پر کام کررہے ہیں، جس میں کالکی 2898 AD بھی شامل ہیں۔
امیتابھ بچن کالکی 2898 AD کے سیکوئل میں اشوتتھاما کا کردار نبھائیں گے، ہدایتکار ناگ اشون کی ہدایت کاری میں بننے والے اس سیکوئل میں پربھاس اور کمل ہاسن مرکزی کردار میں نظر آئیں گے۔
