آر ڈی اے میں حج 2025 کی قرعہ اندازی، دو خوش نصیب ملازمین منتخب

راولپنڈی: ڈائریکٹر جنرل راولپنڈی ڈویلپمنٹ اتھارٹی محترمہ کنزہ مرتضیٰ کی ہدایت پر آج آر ڈی اے کانفرنس روم میں حج برائے سال 2025 کے سلسلے میں قرعہ اندازی کا انعقاد کیا گیا۔ تقریب کی صدارت ڈی جی آر ڈی اے نے کی، جبکہ ڈائریکٹر ایڈمن اینڈ فنانس قاضی صہیب احمد، آر ڈی اے کے دیگر افسران و ملازمین اور سی بی اے یونین کے نمائندگان بھی موجود تھے۔ تقریب کا آغاز تلاوت کلام پاک سے کیا گیا، جس کے بعد گریڈ 1 تا 16 کے آر ڈی اے ملازمین کے لیے حج کی سعادت حاصل کرنے کے لیے قرعہ اندازی کی گئی۔ اس بابرکت موقع پر دو خوش نصیب ملازمین، یاسر حسین (جونیئر کلرک، گریڈ 11) اور جناب طارق محمود (ایف ای لوڈر، گریڈ 5) حج کی سعادت حاصل کرنے کیلئے کامیاب قرارپائے۔ تقریب میں موجود افسران، ملازمین اور یونین عہدیداران نے دونوں کامیاب ملازمین کو مبارکباد دی اور ان کے لیے نیک خواہشات کا اظہار کیا۔ اس موقع پر شرکاء نے ڈی جی آر ڈی اے محترمہ کنزہ مرتضیٰ کا خصوصی شکریہ ادا کیا جن کی سرپرستی میں ادارے میں شفافیت اور فلاحی اقدامات فروغ پا رہے ہیں۔

ڈائریکٹر ایڈمن و فنانس آرڈی اے قاضی صہیب احمد نے اس موقع پر کہا کہ تمام افعال میں شفافیت کو یقینی بنایا جائے تاکہ ادارے کی ساکھ اور اعتماد میں مزید اضافہ ہو۔ ڈی جی آر ڈی اے نے خطاب کرتے ہوئے ہدایت کی کہ شفافیت کے اصولوں پر کاربند رہ کر ادارے کو مزید مضبوط بنایا جائے۔ انہوں نے کہا کہ دیانت داری، پیشہ ورانہ رویے اور قواعد و ضوابط کی پاسداری کے ذریعے ادارے کو مزید مضبوط بنایا جا سکتا ہے، جو نہ صرف ملازمین بلکہ عوام کے لیے بھی اعتماد کا باعث ہوگا۔ انہوں نے مزید کہا بہت جلدانفورسمنٹ اسکواڈ کو مستحکم کیا جائے گا جبکہ سیکیورٹی گارڈز اور بلڈنگ کنٹرول ونگ کے لیے سرویئرز کی بھرتی بھی کی جائے گی۔۔۔۔۔۔۔۔