ترناوا تا کوہالہ روڈپختہ کرو: اپنے علاقے کے بنیادی حق پر کسی قسم کا سمجھوتہ قبول نہیں کریں گے
وفاداری اپنی جگہ، مگر حق پر سمجھوتہ نہیں! 14 اگست تک عملی اقدام نہ ہوا تو احتجاج ناگزیر ہوگا،پی ٹی آئی ورکرز
ترناوا تا کوہالہ روڈ کی تعمیر کے معاملے پر پاکستان تحریکِ انصاف کے ووٹرز اور کارکنوں نے اپنے حق کے لیے آواز بلند کر دی ہے۔ سوشل میڈیا پر جاری ہونے والے عوامی پیغام میں پی ٹی آئی ورکرز نے واضح کر دیا ہے کہ وہ پارٹی سے وابستگی ضرور رکھتے ہیں، لیکن اپنے علاقے کے بنیادی حق پر کسی قسم کا سمجھوتہ قبول نہیں کریں گے۔
پیغام میں کہا گیا ہے کہ 3 اگست کو ایم این اے اور ایم پی اے کے متوقع دورے کے موقع پر وہ ان سے اس روڈ کی پختگی سے متعلق واضح اور عملی اعلان چاہتے ہیں۔ بصورت دیگر، اگر 14 اگست تک اس اہم منصوبے پر کوئی فیصلہ سامنے نہ آیا تو ترناوا اور اردگرد کے علاقے کے پی ٹی آئی ورکرز خود احتجاج کا راستہ اختیار کریں گے۔
پی ٹی آئی سپورٹرز کا کہنا ہے کہ وہ اندھی تقلید کے قائل نہیں بلکہ اصول، حق اور خدمت پر یقین رکھتے ہیں۔ ترناوا تا کوہالہ روڈ کو وہ اپنا حق سمجھتے ہیں اور وعدہ یاد دلانا اپنا فرض۔ کارکنان نے اعلان کیا ہے کہ وہ خاموش نہیں بیٹھیں گے، اور علاقے کی ترقی کے لیے عملی جدوجہد کریں گے۔
یہ عوامی موقف ایک ایسے وقت میں سامنے آیا ہے،جب عوامی نمائندوں سے توقع کی جا رہی ہے کہ وہ صرف بیانات نہیں، بلکہ عملی اقدامات کے ذریعے عوامی اعتماد کو بحال کریں گے۔
