ڈی جی آئی ایس پی آر کا نوجوانوں سے مؤثر مکالمہ، قومی جذبہ اور افواج سے وابستگی مزید مضبوط

راولپنڈی: ڈائریکٹر جنرل انٹرسروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے ہفتے کے روز راولپنڈی میڈیکل یونیورسٹی کے طلبہ کے ساتھ ایک خصوصی نشست کی، جسے طلبہ کی جانب سے شاندار پذیرائی ملی اور اس میں بھرپور قومی جذبہ جھلکتا رہا۔

ملاقات کے دوران طلبہ نے پاک فوج سے بھرپور یکجہتی کا اظہار کیا اور عہد کیا کہ چاہے دشمن کتنی ہی کوشش کر لے، وہ نوجوانوں اور مسلح افواج کے درمیان دوریاں پیدا کرنے میں کبھی کامیاب نہیں ہو سکے گا۔ انہوں نے افواجِ پاکستان کی دشمن کے مذموم عزائم کو ناکام بنانے کی کاوشوں کی بھرپور حمایت کا اعادہ کیا۔

یہ نشست گزشتہ ماہ گورنمنٹ کالج یونیورسٹی (جی سی یو) لاہور میں ہونے والی ملاقات کے بعد منعقد ہوئی، جہاں لیفٹیننٹ جنرل احمد شریف چوہدری نے طلبہ کو بھارت کے "آپریشن سندور” کو ناکام بنانے میں پاکستان کے فیصلہ کن ردعمل اور حالیہ تنازع میں سچ کی بڑی کامیابی کے بارے میں آگاہ کیا تھا۔

جی سی یو میں انہوں نے آپریشن کے دوران نوجوانوں کے جذبہ، حب الوطنی اور شعور کو سراہا۔ طلبہ نے قومی، سلامتی اور سماجی امور پر کھل کر سوالات کیے، جس سے ملک کے دفاعی معاملات میں ان کی گہری دلچسپی ظاہر ہوئی۔ تقریب کا اختتام طلبہ کی جانب سے افواجِ پاکستان کو خراجِ تحسین پیش کرنے والے ایک جذباتی ملی نغمے پر ہوا۔

دونوں نشستوں کو طلبہ نے ایک مثبت اقدام قرار دیا اور اس بات پر زور دیا کہ مستقبل میں بھی ایسی مزید ملاقاتیں ہونی چاہئیں تاکہ نوجوان نسل اور مسلح افواج کے درمیان رشتہ مزید مضبوط ہو۔