جوہانسبرگ: جنوبی افریقہ نے دورہ پاکستان کے لیے تینوں فارمیٹ کے سکواڈز کا اعلان کردیا۔
پاکستان کے دورے میں جنوبی افریقی ٹیم 2 ٹیسٹ، 3 ون ڈے اور 3 ٹی 20 میچوں کی سیریز کھیلے گی۔
کرکٹ ساؤتھ افریقہ کے مطابق ٹیسٹ کپتان ٹیمبا باووما پنڈلی میں سٹرین کے باعث سیریز سے باہر ہوئے ہیں لہٰذا اب ان کی جگہ ایڈن مارکرم ٹیم کی قیادت کریں گے، اس کے علاوہ کیشو مہاراج پاکستان کے خلاف صرف دوسرے ٹیسٹ کے لیے سکواڈ کا حصہ ہیں کیونکہ ان کا ری ہیب مکمل ہونا باقی ہے۔
ٹی 20 میچز میں جنوبی افریقی ٹیم کی قیادت ڈیوڈ ملر کریں گے اور ون ڈے میں میتھیو بریٹزکے کو عبوری کپتان کی ذمہ داریاں دی گئی ہیں۔
دوسری جانب ون ڈے کرکٹ کو خیرباد کہنے والے کوئنٹن ڈی کاک نے ریٹائرمنٹ واپس لے لی ہے، انہیں اب ٹی 20 اور ون ڈے سکواڈ میں شامل کیا گیا ہے۔
یاد رہے کہ کونئنٹن ڈی کاک ورلڈ کپ 2023 کے بعد ون ڈے سے ریٹائر ہوگئے تھے، بعدازاں انہوں نے وائٹ بال کے دونوں فارمیٹ میں کھیلنے کی خواہش کا اظہار کیا تھا، ان کی ٹی 20 ورلڈکپ 2024 کے بعد ٹیم میں واپسی ہوئی ہے۔
ورلڈ ٹیسٹ چیمپئن شپ میں پاکستان ٹیم پہلی سیریز جنوبی افریقہ کے خلاف کھیل رہی ہے اور سیریز کا پہلا ٹیسٹ 12 اکتوبر سے لاہور جبکہ دوسرا ٹیسٹ 20 اکتوبر سے راولپنڈی میں شیڈول ہے۔
ٹیسٹ سیریز کے بعد 3 ٹی 20 میچز کی سیریز بھی ہوگی جس کا پہلا میچ 28 اکتوبر کو پنڈی میں کھیلا جائے گا جبکہ بقیہ 2 میچز قذافی سٹیڈیم میں 31 اکتوبر اور یکم نومبر کو کھیلے جائیں گے، اسی طرح ٹی 20 انٹرنیشنل میچز کے بعد 3 ون ڈے میچز 4، 6 اور 8 نومبر کو فیصل آباد کی سرزمین پر کھیلے جائیں گے۔
