دنیائے موسیقی کے بادشاہ اور فن قوالی کے شہنشاہ، قوالی کو نئی جہت دینے والے استاد نصرت فتح علی خان کی 77 ویں سالگرہ منائی جارہی ہے۔
کروڑوں دلوں پر راج کرنے والے نصرت فتح علی خان1948 میں فیصل آباد میں پیدا ہوئے اور انہوں نے عارفانہ کلام، گیتوں، غزلوں اور قوالیوں سے دنیا کو اپنا گرویدہ بنایا۔
سروں کے شہنشاہ نے قوالی کے ساتھ غزلیں، کلاسیکل اور صوفی گیت بھی گائے، قوالی میں مغربی انداز متعارف کرایا، صوفیانہ کلام کو اس مہارت سے گاتے تھے کہ سننے والوں پر وجد طاری ہو جاتا، ان کی قوالی ’دم مست قلندر‘ کو عالمی مقبولیت حاصل ہے۔
نصرت فتح علی خان نے قوالی کی صنف میں مغربی انداز متعارف کرایا جسے خوب پذیرائی ملی، ان کی قوالیوں کے 125 البمز ریلیز ہوئے جس کے باعث ان کا نام گنیز بک آف دی ورلڈ ریکارڈ میں درج ہوا جبکہ ٹائم میگزین نے 2006ء میں ایشین ہیروز کی فہرست میں ان کا نام شامل کیا۔
لیجنڈری گلوکار و موسیقار نصرت فتح علی خان نے کئی مشہور شعرا کے لکھے گیت گائے، عالمی سطح پر انہیں ورلڈ میوزک آرٹ اینڈ ڈانس فیسٹیول سے شہرت ملی جس کے بعد ان کی آواز کا جادو سر چڑھ کر بولنے لگا۔
موسیقی کی دنیا میں نئے انداز اپنانے اور قوالی کو مشرق سے مغرب تک مقبول بنانے والےاستاد نصرت فتح علی خان نے پرائیڈ آف پرفارمنس سمیت کئی اعزازت اپنےنام کئے۔
پاکستانی میوزک کا یہ تابناک ستارہ گردوں کے عارضے میں مبتلا ہوکر 48 سال کی عمر میں 16 اگست 1997ء کو ہمیشہ کیلئےغروب ہوگیا تھا لیکن وہ اپنی آواز اور موسیقی کے ذریعے آج بھی مداحوں کے دلوں میں زندہ ہیں۔
