راولپنڈی: پاکستان اور جنوبی افریقا کے درمیان 2 ٹیسٹ میچز کی سیریز کے آخری ٹیسٹ کے تیسرے  روز کا کھیل اختتام پذیر ہوگیا، پاکستان نے 4 وکٹوں پر 94 رنز بناتے ہوئے دوسری اننگز میں23 رنز کی برتری حاصل کرلی۔ 

پنڈی ٹیسٹ کے تیسرے روز  جنوبی افریقا نے ٹیل اینڈرز کی شاندار بیٹنگ کی بدولت پاکستان پر پہلی اننگز میں 71 رنز کی برتری حاصل کی  تھی۔

دوسری اننگز میں پاکستانی ٹاپ آرڈر ناکام ہوا اور صرف 16 رنز پر 3 وکٹیں گر گئیں تھیں جبکہ چوتھا کھلاڑی بھی 60 کے مجموعے پر پویلین لوٹا۔

پاکستان کی جانب سے دوسری اننگز کا آغاز عبداللہ شفیق اور امام الحق نے کیا، امام الحق ایک بار پھر ناکام ثابت ہوئے اور صرف 9 رنز بنا کر ہارمر کا شکار بن گئے۔

پھر عبداللہ شفیق بھی 6 رنز کے مہمان ثابت ہوئے جبکہ کپتان شان مسعود کھاتا کھولے بغیر ہی پویلین لوٹ گئے، سعود شکیل بھی 11 رنز بناسکے۔

ایسے میں بابر اعظم اور رضوان نے دن کے اختتامی اوورز میں ذمہ درانہ بیٹنگ کی اور  تیسرے روز کھیل کے اختتام پر پاکستان نے  4 وکٹوں پر 94 رنز بنالیے اور اسے جنوبی افریقا کے خلاف دوسری اننگز میں 23 رنز کی برتری حاصل ہے۔

بابر اعظم 49 اور محمد رضوان 15 رنز کے ساتھ ناٹ آؤٹ ہیں۔

جنوبی افریقا کی پہلی اننگز

اس سے قبل پہلی اننگز میں جنوبی افریقا کی ٹیم کے ٹیل اینڈرز نے شاندار بیٹنگ کا مظاہرہ کیا، مہمان ٹیم نے آخری 3 وکٹوں پر 194 رنز کا اضافہ کیا اور پاکستان پر 71 رنز کی برتری حاصل کی۔

راولپنڈی ٹیسٹ کے تیسرے روز جنوبی افریقا نے پاکستان کے 333 رنز کے جواب میں  اپنی پہلی نامکمل اننگز کا آغاز 185 رنز 4 کھلاڑی آؤٹ سے کیا تھا لیکن آصف آفریدی نے بغیر کسی رن کے اضافے کے ڈیولڈ بریوس کو پویلین بھیج دیا۔

اس کے بعد آصف آفریدی نے کائل ویرینے اور سیٹ بیٹر ٹریسٹان اسٹبس کو بھی آؤٹ کر کے اپنے پہلے ہی ٹیسٹ کی پہلی اننگز میں 5 شکار مکمل کیے۔ مارکو جینسن کو نعمان علی نے ایل بی ڈبلیو کیا۔

8 کھلاڑیوں کے جلد آؤٹ ہونے کے بعد سینورن متھوسوامے اور کیشو مہاراج نے شاندار بیٹنگ  کی اور 71 رنز کی شراکت قائم کی جبکہ متھو سوامے نے ربادا کے ساتھ ملکر بھی قیمتی 98 رنز کا اضافہ کیا اور ٹیم کا اسکور 404 رنز تک پہنچایا۔

کگیسو ربادا 4 چھکوں اور 4 چوکوں کی مدد سے 71 رنز بنا کر آصف آفریدی کا چھٹا شکار بنے جبکہ متھوسوامے 89 رنز بنا کر ناٹ آؤٹ رہے۔ پاکستان کی جانب سے آصف آفریدی نے شاندار بولنگ کا مظاہرہ کرتے ہوئے 6 کھلاڑیوں کو آؤٹ کیا جبکہ دو وکٹیں نعمان علی کے حصے میں آئی اور ایک ایک کھلاڑی کو شاہین آفریدی اور ساجد خان نے آؤٹ کیا۔

خیال رہے کہ پاکستان نے اپنی پہلی اننگز میں 333 رنز اسکور کیے تھے جس میں کپتان شان مسعود نے 87 رنز کی شاندار اننگز کھیلی تھی جبکہ سعود شکیل نے 66 اور عبداللہ شفیق نے 57 رنز کی اننگز کھیلی تھی۔ جنوبی افریقا کی جانب سے کیشوو مہاراج نے 7 کھلاڑیوں کو آؤٹ کیا تھا۔