چیئرمین جوائنٹ چیفس آف اسٹاف کمیٹی کا جی ایچ کیوکا الوداعی دورہ، فیلڈ مارشل سے الوداعی ملاقات
راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے جی ایچ کیو کا الوداعی دورہ کیا اور آرمی چیف فیلڈ مارشل سید عاصم منیر سے الوداعی ملاقات کی۔
جی ایچ کیو آمد پر جنرل ساحر شمشاد مرزا نے یادگار شہداء پر پھولوں کی چادر چڑھائی۔ پاک فوج کے چاق و چوبند دستے نے انہیں گارڈ آف آنر پیش کیا۔
آئی ایس پی آر کے مطابق فیلڈ مارشل نے جنرل ساحر شمشاد مرزا کی مثالی قیادت، اسٹریٹجک بصیرت اور پاک فوج کے لیے شاندار خدمات کو سراہا۔
فیلڈ مارشل کا کہنا تھا کہ چیئرمین جوائنٹ چیفس آف اسٹاف کمیٹی نے تینوں مسلح افواج کے درمیان ہم آہنگی کے فروغ میں اہم کردار ادا کیا، انہوں نے مسلح افواج کی مشترکہ آپریشنل تیاری کو مضبوط بنانے میں بھی کردار ادا کیا۔
فیلڈ مارشل کا کہنا تھا کہ جنرل ساحر شمشاد مرزا نے قومی سلامتی کے اسٹریٹجک اہداف کے حصول میں بھی اہم کردار ادا کیا۔
آئی ایس پی آر کے مطابق فیلڈ مارشل نے جنرل ساحر شمشاد مرزا کی دوست ممالک کے ساتھ پاکستان کے دفاعی تعاون کو مضبوط بنانے کی کاوشوں اور علاقائی استحکام اور عسکری سفارت کاری کے لیےکاوشوں کو خراج تحسین پیش کیا۔
آئی ایس پی آر کے مطابق جنرل ساحر شمشاد مرزا نے کریئر کے دوران فراہم کی گئی حمایت پر آرمی چیف اور مسلح افواج کا شکریہ ادا کیا۔
