فاطمہ جناح وومن یونیورسٹی (FJWU) راولپنڈی کے زیرِ اہتمام 14ویں ہائر ایجوکیشن کمیشن (HEC) آل پاکستان وومن انٹرویورسٹی تائیکوانڈو چیمپئن شپ 2026-2027 کا انعقاد 19 سے 22 نومبر 2026 تک کیا جا رہا ہے، جس میں ملک بھر سے 25 جامعات کی ٹیمیں بھرپور جوش و خروش کے ساتھ حصہ لے رہی ہیں۔
چیمپئن شپ کی افتتاحی تقریب کے مہمانِ خصوصی وفاقی وزیر برائے ریلوے جناب محمد حنیف عباسی تھے۔ تقریب سے خطاب کرتے ہوئے وفاقی وزیر نے کھیلوں کے فروغ اور نوجوان طالبات کو اپنی صلاحیتوں کے اظہار کے مواقع فراہم کرنے پر وائس چانسلر پروفیسر ڈاکٹر بشریٰ مرزا (صدارتی ایوارڈ برائے حسن کارکردگی، تمغہ امتیاز) کی مثالی قیادت اور کاوشوں کو بھرپور سراہا۔ انہوں نے یونیورسٹی میں کھیلوں کی سرگرمیوں کو مستحکم بنانے کے لیے ڈائریکٹر اسپورٹس ڈاکٹر خرم شہزاد کی خدمات کا بھی اعتراف کیا۔
اس موقع پر وفاقی وزیر جناب محمد حنیف عباسی نے طالبات کی سہولت اور کھیلوں کے بنیادی ڈھانچے کی بہتری کے لیے فاطمہ جناح وومن یونیورسٹی کے اسپورٹس جمنازیم اور آڈیٹوریم کی تزئین و آرائش میں معاونت اور یونیورسٹی کو دو بسیں فراہم کرنے کے عزم کا اعلان کیا۔

فاطمہ جناح وومن یونیورسٹی کی جانب سے وفاقی وزیر جناب محمد حنیف عباسی کا یونیورسٹی کے ساتھ مسلسل تعاون اور خواتین کے کھیلوں و بااختیاری کے فروغ میں گہری دلچسپی لینے پر تہہ دل سے شکریہ ادا کیا گیا۔ اس قومی سطح کی چیمپئن شپ کی میزبانی کے ذریعے FJWU نوجوان خواتین کو کھیلوں کے میدان میں آگے بڑھنے، قائدانہ صلاحیتیں نکھارنے اور قومی و بین الاقوامی سطح پر اپنے اداروں کی نمائندگی کے مواقع فراہم کرنے کے عزم کا اعادہ کرتی ہے۔