فاطمہ جناح ویمن یونیورسٹی کے تئیسویں کانووکیشن کی تقریب؛ 1,439 طالبات میں ڈگریاں تقسیم
احسن اقبال کی فارغ التحصیل طالبات کو پاکستان کی ترقی میں کلیدی کردار ادا کرنے کی تاکید؛ نوجوان نسل کو ’’جنریشن 2.0-47‘‘ قرار دے دیا
(راولپنڈی) فاطمہ جناح ویمن یونیورسٹی پاکستان کی پہلی سرکاری جامعہ برائے خواتین، کی تئیسویں کانووکیشن کی تقریب بدھ کے روز منعقد ہوئی، جس میں وفاقی وزیر برائے منصوبہ بندی، ترقی و خصوصی اقدامات احسن اقبال نے بطور مہمانِ خصوصی شرکت کی۔ تقریب کے دوران مجموعی طور پر 1,439 طالبات کو ڈگریاں تفویض کی گئیں، جن میں 1,230 بیچلرز، 179 ایم ایس/ایم فل اور 30 پی ایچ ڈی کی ڈگریاں شامل ہیں۔ نمایاں تعلیمی کارکردگی کا مظاہرہ کرنے والی طالبات میں 41 گولڈ میڈل اور 27 سلور میڈلز بھی تقسیم کیے گئے۔

تقریب میں پروفیسر ڈاکٹر ارشد بھٹی، وائس چانسلر ورچوئل یونیورسٹی آف پاکستان، رجسٹرار بحریہ یونیورسٹی اور ڈاکٹر رافعہ ممتاز، وائس چانسلر کوہسار یونیورسٹی مری سمیت جامعات کے سینئر عہدیداران، فیکلٹی ممبران، فارغ التحصیل طالبات اور ان کے اہلِ خانہ نے شرکت کی۔
تقریب سے خطاب کرتے ہوئے وفاقی وزیر احسن اقبال نے فاطمہ جناح ویمن یونیورسٹی کے قیام کا حوالہ دیتے ہوئے کہا کہ 1998ء میں اُس وقت کے وزیراعظم میاں محمد نواز شریف کی ہدایات پر تاریخی اولڈ پریزیڈنسی کی عمارت کو پاکستان کی پہلی سرکاری خواتین یونیورسٹی میں تبدیل کیا گیا۔ انہوں نے کہا کہ غربت کے خاتمے اور قومی ترقی کے حصول کے لیے تعلیم بنیادی اہمیت رکھتی ہے۔ فارغ التحصیل طالبات کو ’’جنریشن 2047‘‘ قرار دیتے ہوئے انہوں نے اس اعتماد کا اظہار کیا کہ نوجوان نسل پاکستان کی آزادی کے صد سالہ جشن تک ملک کو ترقی و خوشحالی کی نئی منزلوں پر لے جانے میں اہم کردار ادا کرے گی۔ انہوں نے طالبات پر زور دیا کہ وہ محترمہ فاطمہ جناح کی جدوجہد اور کردار کو مشعلِ راہ بنائیں، نفرتوں سے بالاتر ہو کر آگے بڑھیں، مصنوعی ذہانت سمیت جدید ٹیکنالوجیز کو اپنائیں اور معاشرے کی مثبت تعمیر میں اپنا کردار ادا کریں۔ انہوں نے طالبات کی کامیابیوں میں والدین اور اساتذہ کی خدمات کو بھی سراہا۔
وائس چانسلر پروفیسر ڈاکٹر بشریٰ مرزا (تمغہ حسن کارکردگی، تمغۂ امتیاز) نے اپنے خطاب میں فارغ التحصیل طالبات کو مبارک باد پیش کرتے ہوئے کہا کہ وہ اپنی تعلیم کو دیانت داری، حوصلے اور احساسِ ذمہ داری کے ساتھ بروئے کار لائیں، ٹیکنالوجی کو دانشمندی سے اپنائیں اور آنے والی نسلوں کی معاونت کے لیے اپنا کردار جاری رکھیں۔ انہوں نے طالبات کو جامعہ کے ساتھ اپنے تعلق کو بطور سابق طالبات (Alumnae) برقرار رکھنے اور اپنی پیشہ ورانہ کامیابیوں کے ذریعے معاشرے کی خدمت کرنے کی بھی ترغیب دی۔
وائس چانسلر نے جامعہ کی تعلیمی ترقی اور توسیع پر روشنی ڈالتے ہوئے بتایا کہ فاطمہ جناح ویمن یونیورسٹی اس وقت 32 شعبہ جات میں 104 ڈگری پروگرامز پیش کر رہی ہے۔ نئے تعلیمی اقدامات میں ہیومن نیوٹریشن اینڈ ڈائیٹیٹکس، فن ٹیک، ڈیٹا سائنس اور روبوٹکس و مصنوعی ذہانت کے پروگرامز شامل ہیں۔ جامعہ کے مینجمنٹ سسٹم کے ذریعے داخلوں اور بھرتیوں کے عمل کو ڈیجیٹلائز کر دیا گیا ہے، جبکہ کیمپس II میں اسمارٹ کلاس روم قائم کیا گیا ہے اور ورچوئل یونیورسٹی کے تعاون سے اوپن اینڈ ڈسٹنس لرننگ کا آغاز بھی کیا گیا ہے۔

جامعہ کی بین الاقوامی درجہ بندیوں کا ذکر کرتے ہوئے وائس چانسلر نے بتایا کہ فاطمہ جناح ویمن یونیورسٹی نے کیو ایس ایشیا یونیورسٹی رینکنگز 2027ء میں 1,722 جامعات میں 641ویں جبکہ جنوبی ایشیا میں 178ویں پوزیشن حاصل کی۔ ٹائمز ہائر ایجوکیشن امپیکٹ رینکنگز 2025ء میں جامعہ 401 تا 600 کے بینڈ میں شامل رہی، جبکہ ورلڈ یونیورسٹی رینکنگز فار انوویشن (WURI) 2026ء میں دنیا بھر کی خواتین جامعات میں پہلی پوزیشن حاصل کی۔ اسی رینکنگ کے انڈسٹریل ایپلیکیشن کیٹیگری میں بھی جامعہ نے عالمی سطح پر پہلی پوزیشن حاصل کی۔ مزید برآں، کیو ایس سسٹین ایبلٹی رینکنگز 2027ء میں فاطمہ جناح ویمن یونیورسٹی پاکستان کی سرفہرست خواتین یونیورسٹی قرار پائی۔
تحقیق کے شعبے میں جامعہ نے قومی و بین الاقوامی اشتراک سے 21 تحقیقی منصوبے حاصل کیے، جن کے لیے تقریباً 1.589 ارب روپے کی فنڈنگ رپورٹ کی گئی۔ جامعہ کے تین فیکلٹی ممبران کو اسٹینفورڈ یونیورسٹی اور ایلزیویئر کی جانب سے جاری کردہ 2026ء کی دنیا کے دو فیصد بہترین سائنسدانوں کی فہرست میں بھی شامل کیا گیا۔ اس کے علاوہ، جامعہ ایراسمس منڈس، ڈی اے اے ڈی اور الیگزینڈر وان ہمبولٹ فاؤنڈیشن کے ساتھ اشتراک کے ذریعے بین الاقوامی تحقیقی روابط کو مزید مضبوط بنا رہی ہے۔
فاطمہ جناح ویمن یونیورسٹی کی طالبات نے قومی اور بین الاقوامی سطح کے مختلف مقابلوں میں بھی نمایاں کامیابیاں حاصل کیں۔ جامعہ کی ٹیم نے جیسپ انٹرنیشنل موٹ کورٹ مقابلہ 2026ء میں 33 ٹیموں کے درمیان چوتھی پوزیشن حاصل کی، جبکہ پاکستان ویمنز بلائنڈ کرکٹ ٹیم کی کپتان محترمہ نمرہ رفیق کو وزیراعظم ایوارڈ 2026ء سے نوازا گیا۔ دیگر نمایاں کامیابیوں میں پاک چین گیمز میں سلور میڈل، ای ایم سی او ٹی 2026ء میں جدید اسمارٹ رسٹ بینڈ کی تیاری پر دوسری پوزیشن اور ایس ای ای پاکستان 2026ء کے کلائمیٹ چینج کیٹیگری میں طالبات کے اسٹارٹ اپ ’’کارڈانا یوٹینسلز‘‘ کی پہلی پوزیشن شامل ہیں۔ میڈیا اسٹڈیز کی دو طالبات نے وزیراعلیٰ پنجاب فلم فنڈ کے تحت دس، دس لاکھ روپے کے گرانٹس بھی حاصل کیے۔
جامعہ نے 21 تحقیقی منصوبوں اور تعلیمی اشتراک کے ذریعے قومی و بین الاقوامی روابط کو مزید وسعت دی۔ اس ضمن میں پاک یوکے گیٹ وے پراجیکٹ میں شرکت اور جرمنی کے لیے تعلیمی وفد کا دورہ بھی شامل ہے۔ فاطمہ جناح ویمن یونیورسٹی آل پاکستان ویمن یونیورسٹیز کنسورشیم کے سیکریٹریٹ کی میزبانی بھی کر رہی ہے۔ اسی طرح، عالمی بینک کے تعاون سے جاری تعلیمی منصوبے کے تحت بلوچستان کی 57 طالبات کو بھی تعلیمی مواقع فراہم کیے گئے ہیں۔
انفراسٹرکچر کی ترقی کے حوالے سے جامعہ نے دونوں کیمپسز میں مجموعی طور پر 756.38 کلو واٹ پیک (kWp) صلاحیت کا سولر انرجی سسٹم نصب کیا، جس پر 100 ملین روپے لاگت آئی۔ اس کے علاوہ، 300 طالبات کی گنجائش پر مشتمل نئے ہاسٹل کا افتتاح بھی کیا گیا۔ جامعہ کی تاریخی عمارت بچن نواس کے تحفظ اور بحالی کے لیے ڈائریکٹوریٹ جنرل آف آرکیالوجی اور آغا خان فاؤنڈیشن کے اشتراک سے اقدامات جاری ہیں۔
مستقبل کے ترقیاتی منصوبوں میں آٹزم اینڈ ویل بینگ سینٹر، ایڈوانسڈ آرٹیفیشل انٹیلیجنس لیبارٹری، نرسنگ اینڈ مڈوائفری کالج اور ڈائیگناسٹک لیبارٹری کا قیام شامل ہے۔ وائس چانسلر نے وفاقی وزیر سے آڈیٹوریم، کیمپس II کی چار دیواری اور ٹرانسپورٹ کی سہولت سمیت زیر التوا ترقیاتی منصوبوں کی تکمیل کے لیے تعاون کی درخواست بھی کی۔
تقریب کے اختتام پر معزز مہمانوں کو یادگاری شیلڈز پیش کی گئیں اور گروپ فوٹو بھی لیا گیا۔
1998ء میں قائم ہونے والی فاطمہ جناح ویمن یونیورسٹی پاکستان میں خواتین کی اعلیٰ تعلیم، تحقیق اور جدت کے فروغ کے لیے مسلسل کوشاں ہے۔ جامعہ کے 32 شعبہ جات اور 104 تعلیمی پروگرامز میں اس وقت تقریباً 8,397 طالبات زیرِ تعلیم ہیں۔