راولپنڈی (غلام مصطفیٰ بھٹی)سانحہ کراچی کے پیشِ نظر پنجاب حکومت نے صوبے بھر میں کمرشل عمارتوں کے لیے سخت حفاظتی اقدامات نافذ کرنے کا فیصلہ کر لیا ہے۔ اس سلسلے میں چیف سیکرٹری پنجاب کی زیرِ صدارت تمام کمشنرز اور ڈپٹی کمشنرز کے ساتھ ایک اہم آن لائن اجلاس منعقد ہوا۔
اجلاس کے بعد سیکرٹری لوکل گورنمنٹ نے ہنگامی صورتحال سے نمٹنے اور کسی بھی ممکنہ سانحے سے بچاؤ کے لیے واضح ہدایات جاری کر دیں۔ ہدایات کے مطابق تمام کمرشل عمارتوں میں آگ بجھانے والے آلات (فائر ایکسٹنگوشرز) کی تنصیب لازمی قرار دے دی گئی ہے، جبکہ بلڈنگ کے ہر فلور پر فائر ایکسٹنگوشر کا موجود ہونا بھی ضروری ہوگا۔
سیکرٹری لوکل گورنمنٹ نے لوکل گورنمنٹس کو ہدایات پر سختی سے عملدرآمد کروانے کا حکم دیتے ہوئے کہا ہے کہ تین منزلہ کمرشل عمارتوں میں ہنگامی حالات میں انخلاء کے لیے باہر کی جانب اسٹیل کی سیڑھی لگانا لازمی ہوگا۔ ہدایات میں واضح کیا گیا ہے کہ اسٹیل کی سیڑھی دوسرے فلور سے مضبوطی کے ساتھ منسلک ہونی چاہیے تاکہ ایمرجنسی کی صورت میں محفوظ انخلاء ممکن ہو سکے۔
مزید برآں، اسٹیل کی سیڑھیوں کی تنصیب کے لیے کسی قسم کے این او سی کی شرط عائد نہیں کی گئی۔ پنجاب حکومت نے کمرشل عمارتوں کے مالکان اور انتظامیہ کو 15 دن کی مہلت دیتے ہوئے ہدایت کی ہے کہ وہ مقررہ مدت کے اندر تمام حفاظتی احکامات پر مکمل عملدرآمد کو یقینی بنائیں، بصورتِ دیگر قانونی کارروائی عمل میں لائی جائے گی۔
