پشاور: رمضان کا چاند نظر آگیا ہے اور کل 19 فروری کو پاکستان میں پہلا روزہ ہوگا۔
مرکزی رویت ہلال کمیٹی کا اجلاس پشاور میں ہوا جس کی صدارت چیئرمین مرکزی رویت ہلال کمیٹی مولانا عبدالخبیر آزاد نے کی۔
اجلاس میں ڈی جی وزارت مذہبی امورحافظ عبدالقدوس، سپارکو کے نمائندے شوکت اللہ، محکمہ موسمیات کے نمائندے ڈاکٹرحسن علی بیگ اور وزارت سائنس اینڈ ٹیکنالوجی سے زین العابدین شریک ہوئے۔
پشاور کے علاوہ وفاقی دارالحکومت اسلام آباد اور دیگر صوبائی دارالحکومتوں میں بھی زونل کمیٹیوں کے اجلاس ہوئے۔
ممبر مرکزی رویت ہلال کمیٹی مفتی عتیق اللہ کے مطابق چاند دیکھنے کی 5 شہادتیں سب سے پہلے اپر دیر سے موصول ہوئیں، ضلع مہمند سے بھی 6 شہادتیں زونل رویت ہلال کمیٹی پشاور کو موصول ہوئیں۔
مفتی عتیق اللہ کے مطابق مرکزی رویت ہلال کمیٹی کو 40 شہادتیں موصول ہوئی ہیں۔
چیئرمین مرکزی رویت ہلال کمیٹی مولانا عبدالخبیر آزاد نے چاند نظر آنےکا اعلان کرتے ہوئے کہا کہ پاکستان کے مختلف حصوں میں رمضان کا چاند نظر آگیا ہے،کل بروز جمعرات 19 فروری 2026 کو یکم رمضان المبارک 1447 ہجری ہوگی۔
چیئرمین مرکزی رویت ہلال کمیٹی مولانا عبدالخبیر آزاد نے اہل وطن کو رمضان کی آمدکی مبارک باد دی اور ماہ رمضان کا احترام کرنےکی تلقین کی اور اپیل کی کہ پاکستان اور عالم اسلام کے لیے دعا کریں۔
ان کا کہنا تھا کہ آج دشمن چالاک اور عیار ہے اور وہ کوئی موقع نہیں جانے دیتا کہ کسی طرح پاکستان میں انتشار اور فسادکروائے، لیکن اللہ کا شکر ہےکہ ہماری حکومت اور فیلڈ مارشل عاصم منیرکی زیر قیادت ہماری افواج ان سے نمٹ رہی ہیں، اللہ نے وہ وقت بھی ہمیں دکھایا جب مئی کے مہینے میں غرور سے بھرا ہوا بھارت جو بڑی باتیں کرتا تھا مگر اللہ کی مدد اور ہمارے سپہ سالار کی قیادت میں معرکہ حق میں ہمارے ملک کو کامیابی حاصل ہوئی اور بھارت کا غرور خاک میں مل گیا۔
مولانا عبدالخبیر آزاد نے کا کہنا تھا کہ ہماری مسلح افواج بہادری سے دہشت گردوں کے خلاف لڑ رہی ہیں، فیلڈ مارشل کی قیادت میں معرکہ حق میں بھارت کے خلاف عظیم کامیابی ملی ، ملک میں اتحاد اور وحدت کا مظاہرہ کرنا ہے، وطن سے محبت ایمان کا حصہ ہوتا ہے، بلوچستان کے 12 اضلاع میں دہشت گردی ہوئی، باجوڑ میں لوگ شہید ہوئے، اسلام آباد میں ناخوشگوار واقعہ رونما ہوا، 10 ہزار سے زائد علماء کرام نے خودکش حملوں ، انتہا پسندی کو حرام قرار دیا ہے۔
اجلاس سے قبل چیئرمین مرکزی رویت ہلال کمیٹی مولانا عبدالخبیرآزاد نے عوام سے ماہ رمضان المبارک کا چاند دیکھنےکی اپیل کرتے ہوئےکہاکہ ان شاءاللہ اس سال بھی ملک بھر میں ایک ساتھ رمضان کا آغاز ہوگا۔
دوسری جانب بنگلادیش اور بھارت میں بھی رمضان المبارک کا چاند نظر آگیا ہے اور وہاں بھی کل 19 فروری کو پہلا روزہ ہوگا۔
