آل پاکستان پرائیویٹ سکولزاینڈ کالجز ایسوسی ایشن سمیت دیگر پرائیویٹ ایسوسی ایشنز کی چیئرمین پیرا سے ملاقات، اسلام آباد کے غیررجسٹرڈ پرائیویٹ تعلیمی اداروں جبکہ رجسٹریشن کی رینیول نہ کرانے والے نجی تعلیمی اداروں کو دو ماہ کی مزید مہلت دے دی گئی ہے۔اس بات کا فیصلہ گزشتہ روز چیئرمین پیرا ڈاکٹرغلام علی ملاح سے نجی تعلیمی اداروں کی ایسوسی ایشنز کی میٹنگ کے موقع پرکیا گیا۔ آل پاکستان پرائیویٹ سکولزاینڈ کالجز ایسوسی ایشن کے مرکزی صدر ڈاکٹر ابرار حسین ملک نے چیئرمین پیرا کا شکریہ ادا کیا اور کہا ہے کہ نجی تعلیمی ادارے ملک میں شرح خواندگی میں اضافہ کے لیے اپنا فعال کردار ادا کر رہے ہیں ایسے میں بعض پرائیویٹ سکول جو وقت پر اپنی رجسٹرین نہیں کروا سکے یارجسٹریشن کی تجدید میں تاخیر ہوگئی ہے انہیں یہ سہولت حاصل ہونے سے انہیں آسانی ہو گی اور پیرا کا مقصد بھی پورا کرنے میں مدد ملے گی۔ انہوں نے کہا اسلام آباد میں معیاری تعلیم کی فراہمی کے لیے نجی تعلیمی ادارے پرائیویٹ ایجوکیشنل انسٹیٹیوشنز ریگولیٹری اتھارٹی(پیرا) کے ساتھ مکمل تعاون کر رہے ہیں اور وزارت تعلیم کے اعلیٰ حکام بشمول چیئرمین پیرا ڈاکٹر غلام علی ملاح کے مشکور ہیں جو نجی سکولوں کے مسائل کو سمجھتے ہیں اور ان کو حل کرنے میں بھی اپنا کردار ادا کررہے ہیں۔
