غیر ملکی صحافیوں کو جناح کنونشن سنٹر میں ایک چھت تلے تمام ضروری سہولیات فراہم کی گئی ہیں، وفاقی وزیر اطلاعات عطاء اللہ تارڑ

وفاقی وزیر اطلاعات و نشریات عطاء اللہ تارڑ نے کہا ہے کہ غیر ملکی صحافیوں کو جناح کنونشن سینٹر میں ایک چھت تلے تمام ضروری سہولیات میسر کی گئی ہیں۔ ہفتہ کو یہاں غیر ملکی صحافیوں کو فراہم کی گئی سہولیات کے حوالے سے خصوصی گفتگو کرتے ہوئے وفاقی وزیر اطلاعات نے کہا کہ نائب وزیراعظم اسحاق ڈار کے اعلان کے مطابق ایران اور امریکہ کے صحافیوں کے لئے ویزا آن ارائیول ہوگا۔

انہوں نے کہا کہ کوریج کے لئے دنیا بھر سے صحافی پاکستان پہنچ رہے ہیں، صحافیوں کو ایک ہی چھت تلے تمام ضروری سہولیات فراہم کی جا رہی ہیں۔ انہوں نے کہا کہ پچاس کے قریب صحافی پاکستان پہنچ چکے ہیں، چین، سعودی عرب، جاپان، جرمنی، کوریا سمیت مختلف ممالک سے صحافیوں نے ویزا کی درخواستیں دی ہیں۔ وفاقی وزیر نے کہا کہ وزارت اطلاعات و نشریات نے جناح کنونشن سنٹر میں صحافیوں کے لئے ایک چھت تلے تمام ضروری سہولیات جن میں ہائی اسپیڈ انٹرنیٹ کنیکٹیویٹی، پرنٹرز، کمپیوٹرز شامل ہیں، فراہم کی ہیں جبکہ سکرینز بھی نصب کی گئی ہیں۔

صحافتی امور انجام دینے کے لئے درکار تمام سہولیات یہاں دستیاب ہیں۔ انہوں نے کہا کہ جناح کنونشن سنٹر سے ریڈ زون قریب ہے، صحافی یہاں سے باآسانی کوریج کر سکتے ہیں، صحافیوں کو خصوصی کارڈز جاری کئے گئے ہیں اور انہیں تمام سہولیات ایک ہی جگہ فراہم کرنے کی کوشش کی گئی ہے تاکہ انہیں کوریج میں کوئی دقت نہ پیش آئے۔ وفاقی وزیر نے کہا کہ کوریج کے لئے آنے والے غیر ملکی صحافیوں کو خوش آمدید کہتے ہیں۔