پی ٹی ڈی سی کا پاکستان کی پہلی خاتون بائیکر گلفشاں طارق کا ہیڈ آفس اسلام آباد میں پرتپاک استقبال
پاکستان ٹورازم ڈویلپمنٹ کارپوریشن (پی ٹی ڈی سی)نے پاکستان کی پہلی خاتون بائیکر گلفشاں طارق کا ہیڈ آفس اسلام آباد میں پرتپاک استقبال کیاجو لندن سے پاکستان تک اپنے غیر معمولی اوور لینڈ سفر کی کامیاب تکمیل کے بعد یہاں پہنچیں۔استقبالیہ تقریب میں وزارت بین الصوبائی رابطہ (آئی پی سی)کے سیکرٹری محی الدین احمد وانی،منیجنگ ڈائریکٹر پی ٹی ڈی سی آفتاب الرحمن رانا، پی ٹی ڈی سی کے سینئر افسران اور میڈیا کے نمائندگان نے شرکت کی۔ گلفشاں طارق کو ان کی شاندار کامیابی اور پاکستان کو ایڈونچر ٹورازم اوراوور لینڈنگ کے ایک اہم مرکز کے طور پر اجاگر کرنے میں کردار پر خراج تحسین پیش کیا گیا۔ ان کا یہ سفر خواتین کو بااختیار بنانے کی ایک مضبوط علامت بھی ہےجو خواتین کو رکاوٹیں توڑنے اور اپنےخوابوں کی تکمیل کے لئے حوصلہ فراہم کرتا ہے۔سیکرٹری آئی پی سی محی الدین احمد وانی نے اپنے خطاب میں گلفشاں طارق کے متاثر کن سفر کو سراہتے ہوئے کہا کہ اس طرح کے اقدامات عالمی سطح پر پاکستان کا مثبت اور ترقی پسند تشخص اجاگر کرتے ہیں۔
انہوں نے کہا کہ یہ سرگرمیاں نہ صرف سیاحت کے فروغ میں معاون ہیں بلکہ خواتین کو بااختیار بنانے،ثقافتی تبادلوں اور عوامی روابط کو بھی مضبوط کرتی ہیں جس سے مزید غیر ملکی سیاح پاکستان کا رخ کریں گے۔اس موقع پر گلفشاں طارق نے پاکستان بھر کے اپنے سفر کے تجربات شیئر کرتےہوئے عوام کی مہمان نوازی،سکیورٹی اور تعاون کو سراہا۔ انہوں نے بتایا کہ انہیں پاکستان میں متعدد خواتین بائیکرز سے ملنے اور بات چیت کا موقع ملاجو ان کے لئے انتہائی حوصلہ افزا ء تجربہ رہا۔انہوں نے پاکستان کے سیاحتی اداروں کی مسلسل حمایت کوسراہتے ہوئے اعلان کیا کہ وہ جلد برطانیہ سے 15 بائیکرز کے گروپ کے ہمراہ دوبارہ پاکستان آئیں گی تاکہ ایڈونچر ٹورازم کو مزید فروغ دیا جا سکے۔منیجنگ ڈائریکٹر پی ٹی ڈی سی آفتاب الرحمن رانا نےمہمان کا خیر مقدم کرتے ہوئے ان کی جرأت، عزم اور قائدانہ صلاحیتوں کو سراہا۔ انہوں نے اس عزم کا اعادہ کیا کہ پی ٹی ڈی سی بین الاقوامی سیاحوں، مہم جوؤں اور ایکسپلوررز کی ہر ممکن سہولت فراہم کرتا رہے گا
اور پاکستان کوایڈونچر ٹورازم، اوور لینڈنگ اور جامع سیاحت کے ایک ممتاز مرکز کے طور پر فروغ دیتا رہے گا،خصوصاً خواتین کی شمولیت کی حوصلہ افزائی کی جائے گی۔گلفشاں طارق کی نمایاں خدمات اور متاثر کن سفر کے اعتراف میں پی ٹی ڈی سی کی جانب سے انہیں یادگاری شیلڈز پیش کی گئیں۔گلفشاں طارق کا یہ دورہ اس بات کا عکاس ہے کہ پاکستان بین الاقوامی ایڈونچر سیاحوں کے لیے تیزی سے ایک پرکشش منزل بنتا جا رہا ہے۔ یہ ملک میں موٹر بائیک ٹورازم، اوور لینڈنگ اور بلند پہاڑی مہمات کے وسیع مواقع کو بھی اجاگر کرتا ہےجبکہ خواتین کے حوصلے، خود اعتمادی اور استقامت کا پیغام بھی دیتا ہے۔
