قومی اسمبلی کی قائمہ کمیٹی برائے داخلہ نے اسلام آباد لوکل گورنمنٹ آرڈیننس بل2026 منظورکرلیا، پیپلز پارٹی نے بل کی مخالفت کی۔
قومی اسمبلی کی قائمہ کمیٹی برائے داخلہ نے پیپلز پارٹی کی شدید مخالفت کے باوجود اسلام آباد لوکل گورنمنٹ آرڈیننس بل 2026 کثرت رائے سے منظور کیا۔کمیٹی میں بل پر ووٹنگ کے وقت 12 ممبران موجود تھے۔ 12 میں سے8 نے بل کے حق میں اور پیپلزپارٹی کے 4 ارکان نے مخالفت میں ووٹ دیا۔
بل پربحث کےدوران پاکستان پیپلزپارٹی کے عبدالقادر پٹیل نےکہا کہ اس قانون کے تحت آپ نے ایک ایسا ایڈمنسٹریٹر لگانا ہے جو بغیر کسی میعاد کے شہر کا بادشاہ بن کر بیٹھ جائےگا، اگر اسلام آباد صوبہ بن جائے تو اس کے اختیارات کیا ہوں گے کبھی سوچا ہے؟ اسلام آباد میں لوکل گورنمنٹ الیکشن ہونے ہیں نہ پنجاب میں۔
آغا رفیع اللہ نےکہا کہ اسلام آباد میں اسپتال تک سنبھالے نہیں جاتے، نئے صوبوں کی بات کرتے ہیں۔
وزیر مملکت طلال چوہدری نے کہا کہ اسلام آباد میں اتنی بارشیں ہوئیں،کہیں کوئی زمین کٹی نہ جانی نقصان ہوا، عبدالقادرپٹیل صاحب سوئپنگ اسٹیٹمنٹ نہ دیں، حقائق دیکھ کر اچھی بات کریں۔
عبدالقادر پٹیل نےکہا کہ اسلام آباد کی حالت پر ڈانٹ ڈپٹ چیئرمین کمیٹی خودکرتے رہے ہیں، کراچی ساڑھے چار کروڑ لوگوں کا شہر ہے ان کو روزگار دیتا ہے۔
چیئرمین کمیٹی کا کہنا تھا کہ سیاسی بحث باہرہی کریں تو بہترہے یہ ایجنڈا یہیں ختم کررہا ہوں۔
