اسلام آباد: وفاقی کابینہ نے آئندہ مالی سال کے بجٹ میں سرکاری ملازمین کی تنخواہوں میں 7 فیصد اضافے کی منظوری دے دی۔
وزیراعظم شہبازشریف کی زیرصدارت وفاقی کابینہ کا اجلاس پارلیمنٹ ہاؤس میں ہوا جہس دوران کابینہ نے آئندہ مالی سال کے بجٹ دستاویزات اور فنانس بل مسودے کی منظوری دی۔
وفاقی کابینہ اجلاس کے دوان سرکاری ملازمین کی تنخواہوں میں 7 فیصد اضافے کی منظوری بھی دی گئی۔
ذرائع کےمطابق سرکاری ملازمین کی تنخواہوں میں دو فیز میں اضافہ ہوگا، گریڈ ایک سے16 کےملازمین کی تنخواہوں میں زیادہ اضافہ ہوگا۔
وفاقی کابینہ کے اجلاس سے خطاب میں وزیر اعظم نے کہا کہ آج ہم اپنی حکومت کا تیسرا بجٹ پیش کرنے جارہے ہیں، توقع ہے تیسرابجٹ ہماری معیشت کو مزید تیزی سے آگے لے کر جائے گا، تمام تر معاشی چیلنجز کے باوجود بہتر بجٹ پیش کرنے کی کوشش کی، عوام کا شکریہ ادا کرتا ہوں جنہوں نے بڑے صبر و تحمل سے مہنگائی کو برداشت کیا۔
وزیر اعظم نے کہا کہ مہنگائی 38 فیصد سےکم ہوکرسنگل ڈیجٹ میں آئی لیکن خلیج کی صورتحال سے اس میں تھوڑا اضافہ ہوگیا، تمام چیلنجز کے باجود آج ہماری معیشت بہتر ہورہی ہے۔
وزیر اعظم شہباز شریف نے کہا کہ اس بجٹ کو بنانے میں بہت چیلنجز تھے، ہمیں عام آدمی کی مشکلات کا بخوبی اندازہ ہے۔
وزیر اعظم شہباز شریف نے کہا کہ ہمیں سولر، ونڈ اور بیٹری اسٹوریج جیسے توانائی ذرائع پر توجہ دینے کی ضرورت ہے، ہمیں پانی کے ذخائر اور ڈیمز تعمیر کرنے ہیں۔
