پاکستانی نژاد امریکی شہری عائشہ خان ڈیموکریٹک پارٹی کی جانب سے اسٹیٹ سینٹرل کمیٹی کی رکن منتخب ہو گئی ہیں۔ انہوں نے میری لینڈ کے پرائمری انتخابات میں بھاری اکثریت سے کامیابی حاصل کی۔
عائشہ خان کی اس کامیابی کو کمیونٹی حلقوں میں بڑے پیمانے پر سراہا جا رہا ہے۔ مسلمز آف امریکہ کے بانی ڈاکٹر ساجد تارڑ نے ان کی جیت پر ردعمل دیتے ہوئے کہا کہ یہ صرف عائشہ خان کی کامیابی نہیں، بلکہ پوری کمیونٹی کی فتح ہے۔ عائشہ نے تنقید، مخالفت اور ہر رکاوٹ کے باوجود اپنا سفر جاری رکھا اور بالآخر کامیابی ان کا مقدر بنی۔
ڈاکٹر تارڑ نے عائشہ خان کو مبارکباد پیش کرتے ہوئے مزید کہا کہ انہوں نے ثابت کر دیا ہے کہ اگر خواتین عزم کر لیں تو وہ ہر اس منزل تک پہنچ سکتی ہیں جس کا وہ خواب دیکھتی ہیں۔
اس موقع پر عائشہ خان نے اپنی جیت کو کمیونٹی اور اہل خانہ کی حمایت کا نتیجہ قرار دیا۔ ان کا کہنا تھا کہ یہ کامیابی صرف میری نہیں، بلکہ ان تمام افراد کی ہے جنہوں نے اپنا قیمتی وقت نکال کر ووٹ ڈالا۔ اس جدوجہد میں کمیونٹی کی سپورٹ اور فیملی کا ساتھ کلیدی حیثیت رکھتا ہے۔
انہوں نے اس عزم کا اعادہ کیا کہ وہ اس پلیٹ فارم سے کمیونٹی کی فلاح و بہبود کے لیے اپنی کوششیں مزید تیز کریں گی۔ عائشہ خان نے کہا کہ یہ کامیابی منزل نہیں، بلکہ منزل کی جانب پہلی سیڑھی ہے۔
تقریب میں پاکستانی امریکی کمیونٹی کے اراکین کی بڑی تعداد نے شرکت کی اور عائشہ خان کو ان کی کامیابی پر مبارکباد پیش کی ۔
