ریاض، : سعودی عرب نے غیر ملکیوں کو ملک میں جائیداد کی ملکیت کی اجازت دینے والے نئے قانون کی منظوری دے دی ہے۔ یہ فیصلہ ولی عہد شہزادہ محمد بن سلمان کی زیر صدارت جدہ میں ہونے والے کابینہ اجلاس میں کیا گیا، جو سعودی معیشت میں عالمی سرمایہ کاری کے فروغ کی جانب ایک اہم قدم تصور کیا جا رہا ہے۔
العربیہ کے مطابق اجلاس کے دوران ولی عہد نے انڈونیشیا کے صدر برابوو سوبیانتو سے ہونے والی ملاقات اور جرمن چانسلر فریڈرش میرٹز کے ساتھ ٹیلیفونک رابطے کی تفصیلات سے کابینہ کو آگاہ کیا۔ سعودی-انڈونیشین اعلیٰ رابطہ کونسل کے پہلے اجلاس میں حاصل شدہ نتائج کو سراہا گیا، جن سے دونوں ممالک کے درمیان تعلقات کو مزید تقویت ملی ہے۔
اجلاس میں صاف توانائی، پیٹروکیمیکل، اور ایوی ایشن فیول سروسز سمیت کئی شعبوں میں نجی اداروں کے درمیان معاہدوں اور مفاہمتی یادداشتوں پر دستخط کا خیرمقدم بھی کیا گیا۔
اجلاس کے بعد وزیر اطلاعات کے قائم مقام، ڈاکٹر عصام بن سعید نے بتایا کہ کابینہ نے عالمی معیشت کے استحکام اور ترقی کے لیے سعودی عرب کے کردار پر بھی تبادلہ خیال کیا، جس میں "اوپیک پلس” ممالک کے ساتھ تعاون جاری رکھنے پر زور دیا گیا تاکہ تیل منڈیوں میں توازن برقرار رکھا جا سکے۔
یہ قانون سعودی وژن 2030 کے تحت سرمایہ کاری، معیشت کے تنوع اور بین الاقوامی تعلقات کے فروغ کے لیے ایک نمایاں پیش رفت قرار دیا جا رہا ہے۔
