آزاد کشمیر: ملک باسط اعوان کی پاکستان پیپلز پارٹی میں شمولیت، ضلع سدھنوتی میں تاریخی ویلکم ریلی

آزاد جموں و کشمیر (نمائندہ خصوصی) پاکستان پیپلز پارٹی میں شمولیت اختیار کرنے والے ملک باسط اعوان کے اعزاز میں بلوچ بیٹھک، ضلع سدھنوتی میں ایک عظیم الشان ویلکم ریلی کا انعقاد کیا گیا۔ اس تاریخی ریلی میں تقریباً 500 موٹر سائیکلیں، 1000 سے زائد گاڑیاں اور پانچ ہزار سے زائد افراد نے شرکت کی، جو علاقے میں ایک نئی سیاسی تاریخ رقم کر گئی۔
ملک باسط اعوان کی سیاسی شمولیت کے بعد یہ پہلا بڑا عوامی اجتماع تھا، جس میں محمد اشتیاق کیانی نے ان کے شانہ بشانہ کھڑے ہونے کا اعلان کیا۔ اس موقع پر علاقے کی معروف شخصیات، تمام برادریوں کے نمائندگان اور مختلف دیہاتوں کے عوام کی بڑی تعداد موجود تھی۔ریلی میں شرکت کرنے والوں کا تعلق قلعہ ترالخل، تالا باڑی، منوٹا، نالہ پلندری سمیت حلقے کے کونے کونے سے تھا، جنہوں نے پرجوش نعروں اور خیر مقدمی بینرز کے ذریعے باسط اعوان کا پرتپاک استقبال کیا۔اپنے خطاب میں ملک باسط اعوان نے کہا:”یہ محض ایک چھوٹی سی کال تھی، لیکن عوام کی محبت نے اسے تاریخ کی سب سے بڑی ریلی بنا دیا۔ میں اپنے حلقے کی 32 برادریوں سے وعدہ کرتا ہوں کہ ہر ایک برادری کو اپنی ذاتی برادری سمجھ کر ان کے ساتھ کھڑا رہوں گا۔”انہوں نے مزید کہا:”سیاست میں آنے کا واحد مقصد عوامی خدمت ہے۔ روٹی، کپڑا اور مکان ہر شہری کا حق ہے، اور میں اپنی تمام تر توانائیاں اپنے علاقے کی خدمت کے لیے وقف کروں گا۔”
ملک باسط نے مزید کہا کہ”مجھے ٹکٹ ملے یا نہ ملے، جیتوں یا ہاروں، عوام کی محبت ہی میری اصل کامیابی ہے۔”ریلی سے خطاب کرتے ہوئے محمد اشتیاق کیانی نے بھی اپنے مکمل تعاون کا اعلان کرتے ہوئے کہا کہ:”ہم پوری برادری کے ساتھ ملک باسط صاحب کے ساتھ کھڑے ہیں۔”اسی طرح ایس ڈی او اشفاق کیانی نے بھی مکمل حمایت کی یقین دہانی کرواتے ہوئے کہا کہ:”میں اور میری پوری برادری ملک باسط کے ساتھ شانہ بشانہ کھڑے ہیں، اور ہم ہر فورم پر ان کی بھرپور معاونت کریں گے۔”آخر میں ملک باسط اعوان نے تمام برادریوں، دوستوں، نوجوانوں اور بزرگوں کا شکریہ ادا کیا جنہوں نے ریلی کو تاریخی کامیابی میں بدل دیا۔