جاپان میں غیر ملکی سیاحوں کا ریکارڈ اضافہ، پہلی ششماہی میں 2 کروڑ 15 لاکھ کی آمد
جون 2025 میں سیاحتی آمد 7.6 فیصد بڑھی، غیر ملکی سیاحوں کے اخراجات 2.5 ٹریلین ین تک پہنچ گئے
ٹوکیو۔:جاپان میں رواں سال کی پہلی ششماہی کے دوران 21.5 ملین (2 کروڑ 15 لاکھ) غیر ملکی سیاحوں کی ریکارڈ آمد ہوئی ہے۔ یہ اعداد و شمار جاپان نیشنل ٹورازم آرگنائزیشن نے بدھ کو جاری کیے۔
جاری رپورٹ کے مطابق رواں سال کے پہلے چھ ماہ میں غیر ملکی سیاحوں کی تعداد نے گزشتہ سال کا ریکارڈ 17.78 ملین بھی پیچھے چھوڑ دیا،صرف جون 2025 کے دوران غیر ملکی سیاحوں کی تعداد 3.38 ملین رہی جو کہ گزشتہ سال کے اسی ماہ کے مقابلے میں 7.6 فیصد زیادہ اور جون کے مہینے کے لیے اب تک کی بلند ترین سطح ہے۔
جاپان ٹورازم ایجنسی کی ابتدائی رپورٹ کے مطابق اپریل تا جون سہ ماہی میں جاپان آنے والے غیر ملکی سیاحوں کے مجموعی اخراجات میں 18 فیصد سالانہ اضافہ ریکارڈ کیا گیا جو تقریباً 2.5 ٹریلین ین بنتے ہیں۔یہ پیش رفت جاپان کے سیاحتی شعبے کی بھرپور بحالی اور غیرملکی سیاحوں کی بڑھتی ہوئی دلچسپی کو ظاہر کرتی ہے۔
