آمنہ فاطمہ بہترین کھلاڑی، رشدہ فاطمہ ٹاپ اسکورر قرار

اسلام آباد (رپورٹ: سید محمد یاسین ہاشمی) : اولمپیئن اصلاح الدین ہاکی اکیڈمی نے سندھ ویمینز انٹر ڈویژن ہاکی چیمپئن شپ میں اپنی اعلیٰ کارکردگی سے سب کو متاثر کر دیا، جہاں اکیڈمی کی دو نمایاں کھلاڑیوں، اُمنہ فاطمہ خان اور رُشدہ فاطمہ، نے بالترتیب بہترین کھلاڑی اور ٹاپ اسکورر کے اعزازات اپنے نام کیے۔

یہ چیمپئن شپ 2 سے 7 اگست تک عبدالستار ایدھی ہاکی اسٹیڈیم، کراچی میں منعقد ہوئی۔ امنہ فاطمہ خان نے کراچی ڈویژن کی قیادت کرتے ہوئے ٹیم کو چھ میچوں میں ناقابل شکست رکھا۔ ٹیم نے مجموعی طور پر 28 گول اسکور کیے جبکہ ان کے خلاف ایک بھی گول نہیں ہوا، جو کہ ایک نیا ریکارڈ ہے۔ 19 سالہ امنہ فاطمہ، جو کہ رائٹ اِن کی پوزیشن پر کھیلتی ہیں، نے خود بھی 10 گول اسکور کیے اور شاندار کھیل کے باعث انہیں چیمپئن شپ کی بہترین کھلاڑی قرار دیا گیا۔

اکیڈمی کی ایک اور باصلاحیت کھلاڑی، 20 سالہ رشدہ فاطمہ، جو سینٹر فارورڈ کی پوزیشن پر کھیل رہی تھیں، نے مجموعی طور پر 11 گول کیے جن میں دو ہیٹ ٹرکس بھی شامل تھیں۔ وہ چیمپئن شپ کی ٹاپ اسکورر اور فائنل کی بہترین کھلاڑی قرار پائیں۔

اکیڈمی کی ہیڈ کوچ سعیدہ خانم کو بھی چیمپئن ٹیم کی قیادت کرنے پر بہترین کوچ کا اعزاز ملا۔ اکیڈمی کے چیئرمین، اولمپیئن اصلاح الدین صدیقی نے دونوں کھلاڑیوں، کوچ سعیدہ خانم، ٹیم مینیجر زرقہ روبی اور اولمپیئن سمیر حسین کو کامیابی پر مبارکباد دی۔ انہوں نے کہا کہ یہ کامیابی کوچز اور کھلاڑیوں کی انتھک محنت کا نتیجہ ہے، اور انہیں یقین ہے کہ کراچی ڈویژن مستقبل میں بھی اسی جذبے سے فتوحات سمیٹے گا۔

واضح رہے کہ کراچی ڈویژن کی 18 رکنی ٹیم کے تمام کھلاڑیوں کا تعلق اولمپیئن اصلاح الدین ہاکی اکیڈمی سے ہے، جو اس اکیڈمی کی تربیت اور معیار کا واضح ثبوت ہے۔