راولپنڈی میں ایچ پی وی ویکسینیشن مہم کی کامیابی، 3 لاکھ سے زائد بچیاں محفوظ

راولپنڈی (اسٹاف رپورٹ) — راولپنڈی میں 25 تا 27 ستمبر 2025 کے دوران ایچ پی وی (HPV) ویکسینیشن مہم کامیابی کے ساتھ مکمل ہوگئی، جس میں ہدف بنائی گئی 3 لاکھ 95 ہزار 609 بچیوں میں سے 3 لاکھ 7 ہزار 421 بچیوں کو ویکسین لگائی گئی۔ اس طرح مہم کا مجموعی کوریج ریٹ 77.71 فیصد رہا، جو خواتین کی صحت کے حوالے سے ایک بڑی کامیابی قرار دیا جا رہا ہے۔

محکمہ صحت کے مطابق اس مہم میں دوہری حکمتِ عملی اپنائی گئی۔ اسکولوں میں ویکسینیشن کے ساتھ ساتھ کمیونٹی آؤٹ ریچ پروگرامز کا آغاز کیا گیا، جو سب سے زیادہ مؤثر ثابت ہوئے۔ رپورٹ کے مطابق 72 فیصد سے زائد ویکسینیشن کمیونٹی آؤٹ ریچ کے ذریعے ممکن بنائی گئی۔

حکام کا کہنا ہے کہ ویکسین کا حفاظتی پروفائل بھی اطمینان بخش رہا۔ مہم کے دوران صرف 2 معمولی مضر اثرات رپورٹ ہوئے، جو ویکسین کی اعلیٰ سطح کی حفاظت کو ظاہر کرتے ہیں۔

رپورٹ کے مطابق اس مہم کے باوجود 64 ہزار 610 بچیاں ویکسینیشن سے محروم رہ گئیں، جن کی بنیادی وجوہات والدین کی جانب سے انکار اور بچیوں کی عدم دستیابی رہیں۔

محکمہ صحت اور ماہرین کے مطابق یہ مہم خطے میں خواتین کی صحت کے تحفظ کے لیے ایک اہم سنگ میل ہے کیونکہ ایچ پی وی ویکسین گردن رحم (سروائیکل کینسر) سمیت کئی خطرناک بیماریوں سے بچاؤ میں مؤثر کردار ادا کرتی ہے۔ مستقبل میں مزید اقدامات کے ذریعے بچیوں کی سو فیصد کوریج کو یقینی بنانے کے لیے والدین کی آگاہی اور کمیونٹی تعاون کو مزید فروغ دینے کی ضرورت ہے۔