بھارتی ہواؤں سے پنجاب کی فضا مضر صحت، آلودہ ترین شہروں میں لاہور کا دوسرا نمبر
بھارت سے آنے والی ہواؤں سے پنجاب کی فضا بدستور آلودہ ہے جس کے باعث لاہور سمیت مختلف شہروں میں سموگ نے بھی شدت اختیار کرنا شروع کر دی ہے۔
آلودگی کے اعتبار سے لاہور دوسرے نمبر پر ہے، صوبائی دارالحکومت میں اوسط ایئر کوالٹی انڈیکس 471 تک پہنچ گیا، لوئر مال 804، گلبرگ 758، ساندہ روڈ 745، ڈی ایچ اے 724 اور شالیمار میں اے کیو آئی 585 ریکارڈ کیا گیا ہے۔
اس کے علاوہ پنجاب کے دیگر شہر بھی سموگ سے متاثر ہیں، گوجرانوالہ 637، فیصل آباد 365 اور ملتان میں اے کیو آئی 245 کو چھو گیا۔
طبی ماہرین نے شہریوں کو غیر ضروری سفر سے اجتناب برتنے اور ماسک کا استعمال یقینی بنانے کی ہدایت کی ہے۔
دوسری جانب محکمہ موسمیات نے بارشوں کی نوید سنا دی ہے، موسم کا حال بتانے والوں کا کہنا ہے کہ کل سے لاہور میں بادل برسیں گے، بارش کے باعث آلودگی کی شرح میں نمایاں کمی ریکارڈ کی جائے گی۔
دریں اثناء سموگ کے باعث پنجاب میں سکولوں اور کالجز کے اوقات کار میں تبدیلی کی گئی ہے، آج سے تعلیمی ادارے 8 بج کر 45 منٹ پر کھلیں گے۔
