انقرہ:رپورٹ۔ شبانہ ایاز
آج کیچی اورن اورمان پارک، انقرہ میں ایک پُروقار تعزیتی تقریب منعقد کی گئی جس میں آرمی پبلک اسکول پشاور پر 2014 میں ہونے والے سفاک دہشت گرد حملے میں شہید ہونے والے معصوم طلبہ اور اساتذہ کو خراجِ عقیدت پیش کیا گیا۔
تقریب میں پاکستان کے سفیر برائے ترکیہ ڈاکٹر یوسف جنید، ڈپٹی میئر کیچی اورن میونسپلٹی جناب اتیلا زورلو، سول سوسائٹی کے نمائندگان، کیچی اورن میونسپلٹی کے حکام اور سفارت خانہ پاکستان کے افسران نے شرکت کی۔
تقریب سے خطاب کرتے ہوئے سفیر پاکستان ڈاکٹر یوسف جنید نے کہا کہ معصوم بچوں پر حملہ درحقیقت پوری انسانیت کے اجتماعی ضمیر پر حملہ تھا۔ انہوں نے کہا کہ اس سانحے نے پاکستان کے دہشت گردی کے خاتمے کے عزم کو مزید مضبوط کیا۔ انہوں نے قومی ایکشن پلان کی روشنی میں پاک افواج کی جانب سے کیے گئے کامیاب اور فیصلہ کن انسدادِ دہشت گردی اقدامات کا ذکر کرتے ہوئے کہا کہ اگرچہ نمایاں پیش رفت ہوئی ہے، تاہم دہشت گردی کے خلاف جدوجہد جاری ہے۔
سفیر پاکستان نے اس موقع پر ترکیہ کی حکومت اور عوام کا شکریہ ادا کیا کہ وہ دہشت گردی کے معصوم شہداء کی یاد کو زندہ رکھے ہوئے ہیں، اور پاکستان و ترکیہ کے درمیان دہشت گردی کے خلاف مشترکہ یکجہتی کا اعادہ کیا۔
ڈپٹی میئر اتیلا زورلو نے اپنے خطاب میں معصوم بچوں پر ہونے والے بزدلانہ دہشت گرد حملے کی شدید مذمت کی اور کہا کہ ترکیہ کے عوام ہر میدان میں، بالخصوص دہشت گردی کے خلاف جنگ میں، پاکستان کے شانہ بشانہ کھڑے رہیں گے۔
تقریب کے اختتام پر سفیر پاکستان ڈاکٹر یوسف جنید، ڈپٹی میئر اتیلا زورلو اور دیگر معززین نے اے پی ایس شہداء کی یادگار پر پھولوں کی چادر چڑھائی۔ جنوری 2015 میں کیچی اورن میونسپلٹی اور سفارت خانہ پاکستان کے اشتراک سے لگائے گئے درخت آج بھی شہید بچوں کی دائمی یاد کا استعارہ ہیں۔
