تحریکِ تعمیرِ پاکستان پارٹی کی مرکزی کمیٹی کا اہم اجلاس پارٹی صدر جہانگیر اقبال کیانی کی زیرِ صدارت منعقد ہوا۔ اجلاس میں نائب صدر ڈاکٹر اکرام الحق، نائب صدر عاصم علی فیض چشتی، سیکرٹری اطلاعات و نشریات عزیز اعوان اور ضلعی صدر ندیم بشیر مرزا نے شرکت کی۔
اجلاس میں ملکی و بین الاقوامی صورتحال، بالخصوص پاکستان، ترکیہ اور سعودی عرب کے مابین حالیہ معاہدے پر تفصیلی تبادلۂ خیال کیا گیا۔ مرکزی کمیٹی نے اس معاہدے کو پاکستان کے قومی، دفاعی اور سفارتی مفادات کے لیے ایک اہم پیش رفت قرار دیتے ہوئے اس کا بھرپور خیرمقدم کیا۔
اجلاس کے شرکاء نے کہا کہ پاکستان، ترکیہ اور سعودی عرب کے درمیان باہمی تعاون خطے میں امن، استحکام اور مشترکہ مفادات کے فروغ میں اہم کردار ادا کر سکتا ہے۔ پارٹی نے امید ظاہر کی کہ اس معاہدے سے تینوں ممالک کے درمیان دفاعی، اقتصادی اور سفارتی تعلقات مزید مضبوط ہوں گے۔
مرکزی کمیٹی نے فیلڈ مارشل کی دوراندیشی، تدبر اور قومی مفادات کے تحفظ کے لیے اختیار کی جانے والی حکمتِ عملی کو بھی سراہا اور کہا کہ موجودہ علاقائی صورتحال میں پاکستان کی قیادت کی جانب سے دانشمندانہ فیصلے ملک کے وقار اور سلامتی کو مزید مستحکم کرنے میں معاون ثابت ہوں گے۔
اجلاس میں اس عزم کا بھی اظہار کیا گیا کہ تحریکِ تعمیرِ پاکستان پارٹی ملکی خودمختاری، قومی سلامتی، معاشی ترقی اور پاکستان کے وسیع تر قومی مفادات کے لیے اپنی جدوجہد جاری رکھے گی۔
