پیر مہر علی شاہ بارانی زرعی یونیورسٹی راولپنڈی اور قازقستان کی نذربائی یونیورسٹی کے درمیان تحقیق، فیکلٹی و طلبہ کے تبادلے، تعلیمی سرگرمیوں اور باہمی دلچسپی کے دیگر شعبوں میں تعاون کے فروغ کے لیے مفاہمتی یادداشت پر دستخط کیے گئے۔ اس اہم مفاہمتی یادداشت پر دستخط نذربائی یونیورسٹی کے ایک اعلیٰ سطحی وفد کے دورہ بارانی زرعی یونیورسٹی کے موقع پر کیے گئے۔ وفد میں نذر بائی یونیورسٹی کے پرووسٹ پروفیسر ریحان صادق، شعبہ مارکیٹنگ کے ڈائریکٹر دانیار ڈونیماگامبیٹوف اور یونیورسٹی کے دیگر حکام شامل تھے۔ یونیورسٹی آف پرنس ایڈورڈ آئی لینڈ، کینیڈا کے ایسوسی ایٹ ڈین ڈاکٹر اعتزاز اے فاروق بھی اس موقع پر موجود تھے، جنہوں نے دونوں اداروں کے درمیان تعلیمی روابط کے فروغ اور وفد کے دورے کو مؤثر بنانے میں اہم کردار ادا کیا۔ وائس چانسلر بارانی زرعی یونیورسٹی راولپنڈی پروفیسر ڈاکٹر قمر الزمان نے معزز مہمانوں کو خوش آمدید کہا۔ اس موقع پر رجسٹرار، ڈینز، ڈائریکٹرز، مختلف شعبہ جات کے سربراہان اور یونیورسٹی کے دیگر سینئر افسران بھی موجود تھے۔
ملاقات کے دوران وائس چانسلر پروفیسر ڈاکٹر قمر الزمان نے وفد کو بارانی یونیورسٹی کی تعلیمی و تحقیقی سرگرمیوں، جاری ترقیاتی منصوبوں اور اعلیٰ تعلیم و تحقیق کے معیار کو بہتر بنانے کے لیے شروع کیے گئے اہم اقدامات سے آگاہ کیا۔ انہوں نے کہا کہ بین الاقوامی جامعات کے ساتھ تعلیمی شراکت داری تحقیق کی استعداد کار بڑھانے، تجربات اور مہارتوں کے تبادلے اور فیکلٹی و طلبہ کے لیے نئے مواقع پیدا کرنے میں کلیدی کردار ادا کرتی ہے۔
پروفیسر ریحان صادق نے شرکاء کو نذر بائی یونیورسٹی کے تعلیمی پروگرامز، تحقیقی شعبوں اور جدید سہولیات کے بارے میں بریفنگ دی۔ انہوں نے بارانی یونیورسٹی میں جاری تعلیمی اور تکنیکی اقدامات کو سراہتے ہوئے امید ظاہر کی کہ دونوں جامعات کے درمیان یہ شراکت داری بامعنی، دیرپا اور نتیجہ خیز تعاون کا باعث بنے گی۔
دورے کے دوران نذر بائی یونیورسٹی کے وفد نے بارانی یونیورسٹی کی جدید ترین تحقیقی و اختراعی سہولیات کا دورہ بھی کیا، جن میں سنٹر فار پریسیژن ایگریکلچر، نیشنل سنٹر آف انڈسٹریل بائیو ٹیکنالوجی، گرین اے آئی ہائڈروپونک یونٹ اور سنٹر فار ماڈرن ایگریکلچر اینڈ وائر ایفیشینٹ ٹیکنالوجیز شامل ہیں۔ وفد نے یونیورسٹی کی جدید تحقیقی سہولیات اور ٹیکنالوجیز میں گہری دلچسپی کا اظہار کیا اور تحقیق و اختراع کے شعبوں میں یونیورسٹی کی کاوشوں کو سراہا۔
دورے کے اختتام پر بارانی زرعی یونیورسٹی راولپنڈی کی جانب سے نذربائی یونیورسٹی کے وفد کو خیرسگالی اور دوستانہ تعلقات کے اظہار کے طور پر یادگاری شیلڈز بھی پیش کی گئیں۔
