سیکریٹری ہاؤسنگ کا آر ڈی اے کا دورہ، ترقیاتی منصوبوں کی رفتار اور شفافیت پر اطمینان

راولپنڈی: سیکریٹری ہاؤسنگ، اربن ڈیویلپمنٹ و پبلک ہیلتھ انجینئرنگ، کیپٹن (ر) نور الامین مینگل نے راولپنڈی ڈویلپمنٹ اتھارٹی کے جاری ترقیاتی منصوبوں اور ادارہ جاتی اصلاحات کا جائزہ لینے کے لیے آر ڈی اے کا دورہ کیا۔ سیکریٹری ہاؤسنگ کا پرتپاک استقبال ڈائریکٹر جنرل آر ڈی اے کنزہ مرتضیٰ، ایڈیشنل ڈی جی آر ڈی اے منصور احمد خان اور آر ڈی اے، واسا و پی ایچ اے کے دیگر افسران نے کیا۔ آر ڈی اے کانفرنس روم میں منعقدہ اجلاس میں ڈی جی آر ڈی اے کنزہ مرتضیٰ نے ادارے کی اہم سرگرمیوں پر تفصیلی بریفنگ دی، جس میں راولپنڈی رنگ روڈ اور نالہ لئی ایکسپریس وے سمیت متعدد بڑے منصوبوں کی پیش رفت سے آگاہ کیا گیا۔ سیکریٹری ہاؤسنگ نے آر ڈی اے کے کام کی رفتار اور معیار کو سراہتے ہوئے تمام منصوبوں کو بروقت اور شفاف انداز میں مکمل کرنے کی اہمیت پر زور دیا۔ انہوں نے کہا کہ یہ ترقیاتی منصوبے راولپنڈی کے مستقبل کے لیے نہایت اہم ہیں اور ان کی دیانتدارانہ تکمیل کلیدی حیثیت رکھتی ہے۔ ڈی جی آر ڈی اے نے یقین دہانی کرائی کہ منصوبے تیزی سے مکمل ہونے کی جانب گامزن ہیں اور جلد مکمل کر دیے جائیں گے۔ اس موقع پر ڈی جی پی ایچ اے احمد حسن رانجھا اور ایم ڈی واسا محمد سلیم اشرف نے بھی اپنی متعلقہ محکموں کی کارکردگی اور آئندہ کے منصوبوں کے بارے میں بریفنگ دی۔ سیکریٹری ہاؤسنگ نے واسا کی مالی استحکام اور ادارہ جاتی مضبوطی کے لیے آمدنی میں اضافے اور جرات مندانہ اقدامات کی ضرورت پر خاص زور دیا۔ دورے کا اختتام تمام اداروں کی جانب سے ترقیاتی کاموں کی رفتار کو مزید تیز کرنے اور راولپنڈی کے شہریوں کو بہتر خدمات فراہم کرنے کے عزم کی تجدید پر ہوا۔ اس اجلاس میں ڈائریکٹر ایڈمن و فنانس قاضی احمد صہیب، چیف پلانر آر ڈی اے محمد طاہر میو، ڈائریکٹر اسٹیٹ مینجمنٹ شہزاد گوندل، ڈائریکٹر لینڈ ملک غضنفر علی اعوان، ڈائریکٹر بلڈنگ کنٹرول سمیع اللہ نیازی, ڈائریکٹر انجینئرنگ محمد کامران، ڈائریکٹر انجینئرنگ II کومل چوہدری اور آر ڈی اے، واسا اور پی ایچ اے کے دیگر افسران نے بھی شرکت کی۔۔۔۔۔۔۔۔۔۔