اسلام آباد(نامہ نگار خصوصی)کورنگ ٹاون ڈکیٹی،پولیس نے بروقت کارروائی کرتے ہوئے ڈکیٹی کے ماسٹر مائنڈ ملزم عدیل خلیل کو گرفتار کر لیا۔تفصیلات کے مطابق 2 جنوری کو دن دیہاڑے تھانہ لوہی بھیر کی حدود میں ٹی سی ایس بوائے کا روپ دھارتے ہوئے ایک شخص گن پوائنٹ پر گھر میں داخل ہوا اور گیٹ کھلا چھوڑ کر بچوں اور فیملی کو یرغمال بنایا ساتھ ہی 2 مزید لوگ ماسک پہنے گھر میں داخل ہوئے اور میاں بیوی اور بچوں کو یرغمال بنا لیا۔تقریبا 5 گھنٹے تک واردات جاری رہی تمام موبائلز کو ڈکیٹیوں نے اپنے قبضہ میں لیکر بنک اکاونٹس سے ٹرانزیکشنز کیں۔منفرد طرز کی ڈیجیٹل ڈکیٹی کی گئی اور 2 کروڑ کے لگ بھگ رقم و زیورات لے اڑے تھے۔جس پر اسلام آباد پولیس کی مختلف ٹیموں نے کارروائی کرتے ہوئے ڈکیٹی کے ماسٹر مائنڈ کو گرفتار کر لیا اور کچھ ریکوری بھی کر لی گئی ہے۔ذرائع کے مطابق ملزم عدیل خلیل جس کا تعلق باغ آزاد کشمیر سے ہے اس ڈکیٹی کا ماسٹر مائنڈ تھا جو کہ عثمان راحیل کی کمپنی میں پہلے ملازم تھا اس کے پاس اس کی تمام معلومات تھیں جو اس نے اپنے رشتہ دار کو فراہم کیں اور اس کی بنیاد پر پلاننگ کی گئی۔ملزم کو تھانہ لوہی بھیر پولیس نے تحویل میں لیکر ریکوری بھی کی ذرائع کے مطابق پولیس مزید ملزمان کی گرفتاری کیلئے کام کر رہی ہے۔پولیس حکام کاکہنا ہے کہ جلد اس میں شامل تمام کردار گرفتار ہو جائیں گے اور ان سے مکمل ریکوری بھی کر لی جائے گی۔ٹیمیں دن رات کام کر رہی ہیں۔
