وفاقی محتسب برائے انسدادِ ہراسیت (فوسپاہ) نے بینک افسر کو بچے کی پیدائش پر پیٹرنٹی رخصت نہ دینے کے معاملے میں اسٹیٹ بینک آف پاکستان پر 5 لاکھ روپے جرمانہ عائد کر دیا ہے۔
ذرائع کے مطابق وفاقی محتسب فوزیہ وقار نے قرار دیا کہ بینک افسر سید باسط علی کو 30 دن کی پیٹرنٹی رخصت سے محروم رکھنا صنفی بنیاد پر امتیاز اور ہراسمنٹ کے زمرے میں آتا ہے۔ فیصلے کے تحت جرمانے کی رقم میں سے 4 لاکھ روپے شکایت گزار کو ادا کیے جائیں گے جبکہ افسر کو مکمل تنخواہ کے ساتھ 30 دن کی پیٹرنٹی رخصت بھی دی جائے گی۔
محتسب نے وفاقی محتسب برائے انسدادِ ہراسیت کی جانب سے مزید ہدایت کی کہ اسٹیٹ بینک میٹرنٹی اور پیٹرنٹی رخصت ایکٹ 2023 کے تحت باقاعدہ پالیسی مرتب کرے۔ فیصلے میں کہا گیا کہ بچوں کی دیکھ بھال صرف خواتین کی ذمہ داری نہیں اور پیٹرنٹی رخصت سے انکار والدین کی مشترکہ ذمہ داری اور بچے کے بہترین مفاد کے منافی ہے۔
واضح رہے کہ متعلقہ بینک انتظامیہ نے پالیسی موجود نہ ہونے کا جواز بنا کر افسر کی رخصت کی درخواست مسترد کر دی تھی۔
