اسلام آباد( نامہ نگار خصوصی )
وزیراعظم آزاد حکومت ریاست جموں و کشمیر فیصل ممتاز راٹھور نے اسلام آباد کے علاقے ترلائی میں امام بارگاہ پر ہونے والے خودکش دھماکے کی شدید الفاظ میں مذمت کی ہے۔
وزیراعظم آزاد کشمیر نے خودکش دھماکے میں شہید ہونے والے شہریوں کے اہل خانہ سے دلی تعزیت اور ہمدردی کا اظہار کرتے ہوئے کہا کہ دکھ کی اس گھڑی میں وہ متاثرہ خاندانوں کے غم میں برابر کے شریک ہیں۔انہوں نے دھماکے میں زخمی ہونے والوں کی جلد صحت یابی کے لیے خصوصی دعا کی جبکہ شہداء کے بلند درجات کے لیے بھی دعا کی۔
وزیراعظم آزاد کشمیر فیصل ممتاز راٹھور نے کہا کہ مساجد کو نشانہ بنانا نہ صرف انسانیت بلکہ دینِ اسلام پر بھی حملہ ہے۔ انہوں نے کہا کہ دہشت گردی کے خلاف پوری قوم متحد ہے اور ایسے بزدلانہ حملے قوم کے حوصلے پست نہیں کر سکتے۔وزیراعظم آزاد کشمیر نے کہا کہ شہریوں کا تحفظ ریاست کی اولین ذمہ داری ہے اور شہداء کی قربانیوں کو رائیگاں نہیں جانے دیا جائے گا۔انہوں نے کہا کہ ان شاء اللہ دہشت گردی کے اس عفریت کا جلد مکمل خاتمہ ہوگا اور ملک میں امن و امان کا خواب شرمندہ تعبیر ہوگا ۔
