راولپنڈی(غلام مصطفیٰ بھٹی)کنٹونمنٹ بورڈ راولپنڈی (RCB) نے تجاوزات مافیا کے خلاف بڑے پیمانے پر گرینڈ آپریشن کرتے ہوئے کنٹونمنٹ کے مختلف علاقوں میں قائم غیر قانونی تجاوزات کا خاتمہ کر دیا۔ یہ کارروائی سی ای او راولپنڈی کنٹونمنٹ بورڈ کی خصوصی ہدایات پر عمل میں لائی گئی۔
تفصیلات کے مطابق انسدادِ تجاوزات ٹیم نے گرجا روڈ ،ڈھوک سیداں ،مصریال روڈ،ٹینچ بھاٹہ ،پیپلز کالونی اور گردونواح کے علاقوں میں کارروائی کرتے ہوئے سڑکوں، فٹ پاتھوں اور سرکاری حدود میں قائم غیر قانونی دکانوں، تھڑوں اور ریڑھیوں کو ہٹا دیا۔ آپریشن کے دوران تجاوزات کا تین ٹرک سامان ضبط کر کے کنٹونمنٹ بورڈ کے گودام منتقل کر دیا گیا۔
کارروائی کے دوران بھاری مشینری اور نفری کی مدد سے غیر قانونی تعمیرات کو مسمار کیا گیا جبکہ شہریوں کو تجاوزات سے باز رہنے کی ہدایت بھی کی گئی۔ سی ای او راولپنڈی کنٹونمنٹ بورڈ کا کہنا تھا کہ تجاوزات کے خاتمے کا مقصد شہر کی خوبصورتی بحال کرنا، ٹریفک کی روانی بہتر بنانا اور عوام کو سہولیات فراہم کرنا ہے۔
انہوں نے واضح کیا کہ تجاوزات مافیا کے خلاف بلاامتیاز کارروائیاں جاری رہیں گی اور کسی کو بھی سرکاری اراضی پر قبضہ کرنے کی اجازت نہیں دی جائے گی۔ شہریوں سے اپیل کی گئی ہے کہ وہ انتظامیہ سے تعاون کریں اور قانون کی پاسداری کو یقینی بنائیں۔
