سیدہ فاطمتہ الزہرہ اسلامک سینٹر ہلی اور بزم محمدیہ کے زیر اہتمام رمضان شریف کے آغاز سے قبل مستحقین اور ضرورت مندوں میں راشن پیکج کی تقسیم کا سلسلہ جاری ہے۔ حسب اعلان مورخہ 15 فروری 2026 کو مدنی کمیونٹی سینٹر ہلی میں رمضان شریف راشن پیکج کی پہلی قسط کی تقسیم کے موقع پر ایک دعائیہ تقریب کا انعقاد کیا گیا۔
تقریب میں علاقہ کے معززین اور علماء اکرام کی کثیر تعداد شریک ہوئی۔ خصوصی طور پر علامہ واجد علی رضوی صاحب نے دعا کی قیادت کی اور اس نیک عمل کی شرعی حیثیت اور اہمیت پر روشنی ڈالی۔ انہوں نے کہا کہ رمضان کے مقدس مہینے میں غربا اور مساکین کی مدد کرنا نہ صرف موجبِ اجر و ثواب ہے بلکہ معاشرتی ہم آہنگی کا بھی ضامن ہے۔
علامہ واجد علی رضوی نے اپنی دعا میں اس راشن پیکج کے ڈونر عمران عباسی صاحب کی صحت، سلامتی، کاروبار میں برکت اور ان کے والد صاحب کی صحت کاملہ و عاجلہ کے لیے خصوصی دعا کی۔ دعائیہ تقریب کے بعد وہاں موجود مستحق خواتین و حضرات میں راشن پیکج تقسیم کیے گئے۔
اس پیکج میں آٹا، چینی، چاول، پتی (چائے کی پتی)، بیسن، چنے، ککنگ آئیل، کھجوریں، روح افزا، نمک، مرچ، ہلدی سمیت دیگر ضروری اشیاء شامل تھیں۔ جو پیکج زائد بچ گئے ہیں، ان کی تقسیم بھی اسی جگہ پر جاری رہے گی۔
علاقے کے عوام نے سیدہ فاطمتہ الزہرہ اسلامک سینٹر اور بزم محمدیہ کی اس فلاحی کاوش کو بھرپور سراہا اور انتظامیہ کے عزم و خدمت کو خراج تحسین پیش کیا۔ اس موقع پر انتظامیہ کی جانب سے اعلان کیا گیا کہ ان شاءاللہ رمضان شریف کا دوسرا پیکج بھی جلد ہی اسی جگہ تقسیم کیا جائے گا۔
