اپنے اہم بیان میں ملک سہیل اعوان نے وزیر اعلیٰ پنجاب محترمہ مریم نواز اور ضلعی انتظامیہ سمیت تمام سرکاری اداروں پر مکمل اعتماد کا اظہار کیا۔ انہوں نے کہا کہ وہ جمہوری رویوں پر یقین رکھتے ہیں اور ہمیشہ اپنے مخالفین کا مقابلہ احسن انداز میں کیا۔ اللہ تعالیٰ نے عزت اور کامیابی عطا کی، جس کے بعد انہوں نے تاجر برادری اور عوام کے حقوق کے لیے عملی جدوجہد کا آغاز کیا۔انہوں نے کہا کہ کمرشل مارکیٹ راولپنڈی شہر کی اہم اور بڑی مارکیٹوں میں شمار ہوتی ہے اور ایسے عناصر کو بنا انتخابات کے منتخب ہونا چاہتے ہیں وہ کسی طور پر بھی عوامی نمائندگی کا حصہ نہیں بن سکتے۔ ان کے مطابق اس وقت تین مختلف دھڑے ہیں۔اءک صاحب خود کو مرکزی انجمن تاجران کا جنرل سیکرٹری اور ریسٹورنٹ ایسوسی ایشن کا نمائندہ ظاہر کر رہے ہیں، جو حقائق کے منافی ہے۔ملک سہیل اعوان نے واضح کیا کہ راولپنڈی ریسٹورنٹس کیٹررز سویٹس اینڈ بیکرز ایسوسی ایشن پاکستان کے صدر محمد فاروق چوہدری اور چیئرمین ممتاز احمد ہیں۔ انہوں نے الزام عائد کیا کہ بعض عناصر تجاوزات اور مہنگی روٹی فروخت کرنے میں ملوث ہیں اور اپنے کاروباری مفادات کے تحفظ کے لیے یونین کا نام استعمال کرتے ہیں، جب کہ ان کا تاجروں کے حقیقی مسائل سے کوئی تعلق نہیں۔انہوں نے کہا کہ ضلعی انتظامیہ اور دیگر حکومتی اداروں سے تعاون کرنا ان کا فرض ہے اور پنجاب حکومت کے جاری کردہ ایس او پیز پر عملدرآمد ہم سب کی ذمہ داری ہے۔ وزیر اعلیٰ پنجاب محترمہ مریم نواز کے اقدامات کو سراہتے ہوئے انہوں نے کہا کہ ان پالیسیوں کی بدولت آج غریب عوام کو 14 روپے میں روٹی دستیاب ہے اور دودھ سمیت دیگر اشیائے خورونوش ملاوٹ سے پاک فراہم کی جا رہی ہیں۔ملک سہیل اعوان نے اسسٹنٹ کمشنر ایمان ظفر کو تجاوزات کے خاتمے میں مؤثر کردار ادا کرنے پر خراجِ تحسین پیش کیا اور انتظامیہ سے مطالبہ کیا کہ منفی پروپیگنڈا اور انتشار پھیلانے والے عناصر کے خلاف سخت کارروائی عمل میں لائی جائے تاکہ امن و امان کی صورتحال متاثر نہ ہو۔انہوں نے مزید کہا کہ کمرشل مارکیٹ کا ماحول مکمل طور پر پرامن ہے، پھیری والوں کے داخلے پر پابندی عائد ہے اور یونین کے پلیٹ فارم سے بائیس مرد و خواتین پر مشتمل سیکیورٹی گارڈز تعینات کیے گئے ہیں تاکہ امن و سلامتی کو یقینی بنایا جا سکے۔ انہوں نے اس عزم کا اعادہ کیا کہ تاجر برادری کے جائز حقوق کے تحفظ، مارکیٹ کی بہتری اور عوامی سہولت کے لیے ان کی جدوجہد جاری رہے گی۔
