بحریہ یونیورسٹی اسلام آباد کے 28ویں کانووکیشن کی تقریب منعقد ہوئی۔ سربراہ پاک بحریہ ایڈمرل نوید اشرف، پرو چانسلر بحریہ یونیورسٹی نے اس موقع پر بطور مہمان خصوصی شرکت کی اور فارغ التحصیل طلباء میں ڈگریاں تقسیم کیں۔
کانووکیشن کے دوران 3300 سے زائد گریجویٹس کو مختلف شعبوں میں ڈگریاں دی گئیں۔ اس کےعلاوہ، طلباء کو ان کی غیر معمولی کامیابیوں کے اعتراف میں 108 گولڈ میڈلز اور 105 سلور میڈلز سے نوازا گیا۔
تقریب سے خطاب کرتے ہوئے سربراہ پاک بحریہ نے گریجویٹ ہونے والے طلباء اور ان کے والدین کو ایک اہم تعلیمی سنگ میل عبور کرنے پر مبارکباد دی۔ انہوں نے ملکی ترقی میں اعلیٰ تعلیمی اداروں کے کلیدی کردار پر زور دیا۔ مہمانِ خصوصی نے ملک کے معتبر ترین قومی اداروں میں شامل ہونے پر بحریہ یونیورسٹی کی غیر معمولی ترقی کی تعریف کی۔ انہوں نے مختلف انڈرگریجویٹ اور پوسٹ گریجویٹ پروگراموں کے آغاز اور ملک کے بڑے شہروں میں یونیورسٹی کے بنیادی ڈھانچے کی بتدریج توسیع کو بھی سراہا۔
تقریب میں پاک بحریہ کے افسران، ممتازسماجی شخصیات، بحریہ یونیورسٹی کے حکام اور فارغ التحصیل طلباء کے والدین نے شرکت کی۔
