PINTECH Expo 2026: فاطمہ جناح ویمن یونیورسٹی کے 12 تحقیقی منصوبے منتخب STEM شمولیت کے فروغ کا پانچ سالہ معاہدہ
فاطمہ جناح وومن یونیورسٹی (FJWU) نے ہونہار پنجاب انوویشن اینڈ ٹیکنالوجی ایکسپو (PINTECH Expo 2026) میں غیر معمولی کارکردگی کا مظاہرہ کرتے ہوئے علمی تحقیق، بین الاقوامی تعلیمی سفارت کاری اور خواتین کی قیادت میں جدت و اختراع کے میدان میں اپنی برتری ثابت کر دی ہے۔ اس میگا ایونٹ کے نمایاں پارٹنر کی حیثیت سے یونیورسٹی کی نمائندگی وائس چانسلر پروفیسر ڈاکٹر بشریٰ مرزا (صدارتی ایوارڈ برائے حسن کارکردگی، تمغہ امتیاز) نے کی، جبکہ ڈائریکٹر اورک (ORIC) حشام اختر، اورک ٹیم اور یونیورسٹی کے دیگر نمائندگان بھی ان کے ہمراہ تھے۔
ایکسپو میں فاطمہ جناح وومن یونیورسٹی کے 12 کامیاب تحقیقی منصوبے منتخب کر کے پیش کیے گئے، جنہوں نے عصری صنعتی اور ماحولیاتی چیلنجز کے عملی حل پیش کرتے ہوئے شرکاء اور ماہرین کی بھرپور توجہ حاصل کی۔ یونیورسٹی کے لیے انتہائی فخر کے لمحے میں شعبہ ماحولیاتی سائنسز کے منصوبے بعنوان “Development and Scaling of Green Plastics for a Sustainable Circular Economy” (پروجیکٹ نمبر PHEC/PINTECH/2026/0547) نے کیمیکل، پولیمر اور ٹیکسٹائل انجینئرنگ کی کیٹیگری میں تیسری پوزیشن
حاصل کر کے قومی اعزاز اپنے نام کیا۔ یونیورسٹی انتظامیہ نے اس شاندار کامیابی پر طالبات ماریہ قیوم اور اقراء صفدر اور ان کی نگران اسسٹنٹ پروفیسر ڈاکٹر نوشابہ تبسم کو دلی مبارکباد پیش کی۔

تحقیقی میدان میں اس قومی فتح کے ساتھ ساتھ، FJWU نے عوامی جمہوریہ چین کی زراعت، جنگلات اور ماحولیاتی سائنسز کی صفِ اول کی جامعہ نارتھ ویسٹ اے اینڈ ایف یونیورسٹی (NWAFU) کے ساتھ تحقیق، ترقی اور تعلیمی تعاون کے پانچ سالہ لیٹر آف انٹینٹ (LOI) پر دستخط کر کے عالمی اشتراک کا نیا باب رقم کیا۔ معاہدے پر FJWU کی جانب سے وائس چانسلر پروفیسر ڈاکٹر بشریٰ مرزا (صدارتی ایوارڈ برائے حسن کارکردگی، تمغہ امتیاز) اور NWAFU کی جانب سے شانشی بیلٹ اینڈ روڈ جوائنٹ لیبارٹری کے ڈائریکٹر اور سائنو پاک بائیو ہیلتھ ایگریکلچر اوورسیز سائنس ٹیک ڈیمونسٹریشن پارک کے چیف سائنٹسٹ پروفیسر ڈاکٹر لیکسن ژانگ (Prof. Dr. Lixin Zhang) نے دستخط کیے۔

شمال مغربی چین اور پاکستان کے بارانی خطہ پوٹھوہار کے نیم خشک موسمی حالات میں پائی جانے والی مماثلت کے پیشِ نظر یہ اشتراکِ عمل دونوں ممالک کے مشترکہ زرعی اور ماحولیاتی مسائل کے حل کے لیے غیر معمولی اہمیت رکھتا ہے۔ آئندہ پانچ برسوں کے دوران دونوں جامعات زراعت میں سائنس اور ٹیکنالوجی کے استعمال، سائنس، ٹیکنالوجی، انجینئرنگ اور ریاضی (STEM) کے شعبوں میں خواتین کی شمولیت، خشک سالی کی زراعت، موسمیاتی تبدیلیوں سے مطابقت، مٹی اور پانی کے تحفظ، پلانٹ بائیو ٹیکنالوجی، فوڈ سائنس، ماحولیاتی تحفظ، جنگلات اور مصنوعی ذہانت (AI) پر مل کر کام کریں گی۔ اس معاہدے کے تحت مشترکہ لیبارٹریز کے قیام، فیلڈ ٹرائلز، اساتذہ و طلبہ کے تبادلے اور خواتین کی زیرِ قیادت زرعی ٹیکنالوجی و ماحولیاتی اسٹارٹ اپس کی سرپرستی کو بھی فروغ دیا جائے گی۔
اس موقع پر وائس چانسلر پروفیسر ڈاکٹر بشریٰ مرزا (صدارتی ایوارڈ برائے حسن کارکردگی، تمغہ امتیاز) نے کہا کہ یہ کامیابیاں نوجوان خواتین محققین کو بااختیار بنانے، عالمی تعلیمی روابط کو مضبوط کرنے اور علمی تحقیق کو ایسے عملی اقدامات میں ڈھالنے کے لیے FJWU کے عزم کی عکاس ہیں جن کے براہِ راست ثمرات کسانوں، خاندانوں اور مقامی کمیونٹیز تک پہنچیں۔