راولپنڈی میں ڈینگی اور پولیو کے خلاف نمایاں کامیابیوں کے اعتراف اور آئندہ حکمت عملی کو مزید مؤثر بنانے کے عزم کے ساتھ ڈسٹرکٹ ایڈمنسٹریشن ،ڈسٹرکٹ ہیلتھ اتھارٹی راولپنڈی اور سیور فوڈز کے باہمی اشتراک سے ایک باوقار تقریب کا انعقاد ہوا۔ جس میں سیاسی نمائندگان محکمہ صحت کے افسران ،سماجی رہنماؤں اور تاجر برادری نے بھرپور شرکت کی۔تقریب کا آغاز تلاوتِ قرآن پاک اور قومی ترانے سے ہوا۔ تقریب میں ممبران قومی اسمبلی طاہرہ اورنگزیب، بیرسٹر دانیال چوہدری، ممبران صوبائی اسمبلی زیب النساء اعوان،اسماء ناز عباسی ،رفعت عباسی ،شاذیہ رضوان، بیگم تحسین فواد،عظمی کاردار، راجہ حنیف ایڈووکیٹ، چوہدری محمد نعیم سیور فوڈ و سرپرست اعلیٰ راولپنڈی ریسٹورنٹس کیٹررز سویٹس اینڈ بیکرز ایسوسی ایشن پاکستان، ممتاز احمد چیئرمین ایسوسی ایشن، محمد فاروق چوہدری صدر ایسوسی ایشن سمیت محکمہ صحت ضلع راولپنڈی کے افسران اور عملے کی بڑی تعداد نے شرکت کی۔
ممبر قومی اسمبلی بیرسٹر دانیال چوہدری نے کہا کہ راولپنڈی میں صحت کے مسائل پر قابو پانے میں محکمہ صحت کی کاوشیں قابلِ تحسین ہیں۔ پندرہ سال کے دوران ضلع راولپنڈی میں پولیو کا ایک بھی نیا کیس ریکارڈ نہیں ہوا۔وزیر اعلیٰ پنجاب محترمہ مریم نواز کی ہدایات کے مطابق ایس او پیز پر سختی سے عملدرآمد یقینی بنایا گیا۔ انہوں نے نالہ لئی کی صفائی پر زور دیتے ہوئے کہا کہ صفائی کے بہتر انتظامات سے بیماریوں کی روک تھام ممکن ہے۔چیف ایگزیکٹو ڈسٹرکٹ ہیلتھ احسان غنی نے بتایا کہ گزشتہ برس راولپنڈی میں ڈینگی کے 6000 سے زائد کیسز رپورٹ ہوئے تھے، تاہم مؤثر اقدامات کے باعث ستر فیصد کمی لائی گئی۔ سال 2024 میں ڈینگی کے 6606 کیسز کے مقابلے میں سال 2025 میں یہ تعداد کم ہو کر 1586 رہ گئی۔ انہوں نے کہا کہ پندرہ سال سے راولپنڈی ضلع میں پولیو کا کوئی نیا کیس ریکارڈ نہیں ہوا اور سرکاری و نجی ہسپتالوں اور لیبارٹریز نے ڈینگی کیسز کی تشخیص اور علاج میں مکمل تعاون فراہم کیا۔
ممبر قومی اسمبلی طاہرہ اورنگزیب نے خطاب کرتے ہوئے کہا کہ لاہور کے مقابلے میں راولپنڈی میں ڈینگی اور پولیو کے لیے بجٹ کم تھا، اس کے باوجود راولپنڈی نے نمایاں کارکردگی دکھائی۔ دن رات محنت کے باعث ڈینگی کیسز میں ستر فیصد کمی ممکن ہوئی۔ انہوں نے اسماء ناز عباسی کی صحت کے شعبے میں خدمات کو سراہتے ہوئے کہا کہ وزیر اعلیٰ پنجاب محترمہ مریم نواز کا ویژن ملک کو پولیو سے پاک کرنا ہے اور وہ عوامی خدمت کے لیے دن رات کوشاں ہیں۔ پچیس سال بعد لاہور میں کامیاب بسنت تہوار کے انعقاد کا سہرا بھی وزیر اعلیٰ پنجاب محترمہ مریم نواز کے سر جاتا ہے، جن کے منصوبے عوام دوست ہیں۔چوہدری محمد نعیم ،ممتاز احمد اور محمد فاروق چوہدری نے کہا کہ عوام کی خدمت اور اداروں کے ساتھ معاونت ہمارا ویژن ہے،ہم وزیر اعلی پنجاب محترمہ مریم نواز کی سوچ کو عملی جامع پہنانے کے لیے سرگرم عمل ہیں۔تقریب کے اختتام پر ڈینگی اور پولیو کے خلاف کامیاب مہم میں نمایاں کردار ادا کرنے والے افسران، عملے اور ممبران اسمبلی کو اعزازی شیلڈز سے نوازا گیا۔
