ایران کو دھمکاکر غیرمنطقی مطالبات پورے کرنے پر مجبور نہیں کیا جاسکتا: پاکستان میں ایرانی سفیر

پاکستان میں ایران کے سفیر رضا امیری مقدم نے کہا ہے کہ ناکہ بندی کے ذریعے بین الاقوامی قانون کی مسلسل خلاف ورزی کر کے اور ایران کو مزید جنگی جرائم کی دھمکیاں دے کر اسے غیر منطقی مطالبات پورے کرنے پر مجبور نہیں کیا جا سکتا۔ 

ایکس پر جاری بیان میں رضا امیری مقدم نے کہا کہ نہ ہی ایسا کیا جا سکتا ہے کہ وقفے وقفے سے فصاحت و بلاغت کے جوہر دکھا کر یہ دعویٰ کیا جائے کہ ہم سفارت کاری کا راستہ اختیار کیے ہوئے ہیں۔

رضا امیری مقدم کا کہنا تھا کہ جب تک ایران کی بحری ناکہ بندی جاری ہے اختلافات موجود رہیں گے۔

خیال رہےکہ امریکا نے ایرانی بحری جہاز پر قبضہ کرلیا ہے، امریکی سینٹرل کمانڈ (سینٹکام) نے کہا ہےکہ جہاز اب امریکی تحویل میں ہے۔

اس سے پہلے امریکی صدر ٹرمپ نے سوشل میڈیا پر کہا تھا کہ امریکا نے ناکہ بندی کی خلاف ورزی کرنے والے ایک ایرانی بحری جہاز کو نشانہ بنا کر اس پر قبضہ کرلیا، امریکی فوج نے ایک ایرانی بحری جہاز کو روکا جو آبنائے ہرمز پر امریکی ناکہ بندی کی خلاف ورزی کی کوشش کر رہا تھا۔