پاکستان میں تاجکستان کے سفیر یوسف شریف زادہ توئر نے اعلان کیا ہے کہ “پائیدار ترقی کے لیے پانی (2018–2028)” کے عالمی عشرے کے تحت چوتھی اعلیٰ سطحی بین الاقوامی کانفرنس 25 سے 28 مئی 2026 تک دوشنبے میں منعقد ہوگی۔
میڈیا بریفنگ کے دوران سفیر نے بتایا کہ دوشنبے واٹر پروسس تاجکستان حکومت کا ایک اہم اقدام ہے، جس کا مقصد اقوام متحدہ کے تعاون سے عالمی آبی اہداف کے حصول کو فروغ دینا ہے۔
انہوں نے کہا کہ اس کانفرنس سیریز کی مشترکہ صدارت تاجکستان کے وزیر اعظم قاہر رسول زادہ اور اقوام متحدہ کے اعلیٰ عہدیدار کرتے ہیں، جبکہ اس سے قبل 2018، 2022 اور 2024 میں کامیاب کانفرنسز منعقد ہو چکی ہیں۔
یہ کانفرنس عالمی سطح پر پالیسی مکالمے، شراکت داری، اور پانی سے متعلق اقدامات کے فروغ کے لیے ایک جامع پلیٹ فارم فراہم کرے گی۔ اس کا مقصد اقوام متحدہ کے واٹر ایکشن ایجنڈا کے تحت کیے گئے وعدوں پر عملدرآمد کو تیز کرنا اور 2030 کے پائیدار ترقیاتی اہداف کے حصول میں پیش رفت کو یقینی بنانا ہے۔
سفیر کے مطابق، کانفرنس بہترین تجربات اور جدید حلوں کے تبادلے، مختلف اسٹیک ہولڈرز کے درمیان تعاون کو مضبوط بنانے اور پانی کے پائیدار استعمال کے لیے عالمی عزم کو بڑھانے میں مددگار ثابت ہوگی۔
یہ اجلاس 2026 کی اقوام متحدہ واٹر کانفرنس کی تیاری میں بھی اہم کردار ادا کرے گا، جبکہ 2028 کی کانفرنس کے لیے بھی بنیاد فراہم کرے گا۔
شیڈول کے مطابق، 25 مئی کو سائیڈ ایونٹس ہوں گے، 26 اور 27 مئی کو مرکزی اجلاس منعقد ہوں گے، جبکہ 28 مئی کو شرکاء کے لیے فیلڈ وزٹس کا اہتمام کیا جائے گا۔
کانفرنس میں دنیا بھر سے حکومتی نمائندے، بین الاقوامی ادارے، مالیاتی تنظیمیں، نجی شعبہ، سول سوسائٹی، ماہرین تعلیم اور مقامی کمیونٹیز شرکت کریں گی۔
