وفاقی وزیر اطلاعات و نشریات عطاء اللہ تارڑ نے کہا ہے کہ معرکہ حق میں پاکستان کی جنگی، سفارتی اور بیانیہ کے محاذ پر فتح تاقیامت یاد رکھی جائے گی، معرکہ حق میں کامیابی سے پاکستان کا وقار بلند ہوا ہے، قوم اپنی مسلح افواج کے شانہ بشانہ کھڑی ہے۔ ان خیالات کا اظہار انہوں نے جمعہ کو یہاں لوک ورثہ میں وزارت اطلاعات و نشریات اور وزارت قومی ورثہ و ثقافت کے زیر اہتمام معرکہ حق کی کامیابی کا ایک سال مکمل ہونے پر منعقدہ تقریب سے خطاب کرتے ہوئے کیا۔ اس موقع پر وفاقی سیکرٹری اطلاعات و نشریات اشفاق احمد خلیل بھی موجود تھے۔ وفاقی وزیر اطلاعات نے کہا کہ معرکہ حق اور آپریشن بنیان مرصوص سے منسوب تقریب میں شرکت میرے لئے باعث اعزاز ہے۔ انہوں نے کہا کہ آپریشن بنیان مرصوص اور معرکہ حق نے تاریخ کا رخ موڑ دیا ہے، مئی میں اس عظیم فتح کو ایک سال مکمل ہو گیا ہے جو اللہ تعالیٰ نے اپنے فضل و کرم سے پاکستانی قوم کو عطا فرمائی۔
انہوں نے کہا کہ آج کی تقریب میں بچوں اور بچیوں کا جوش و جذبہ دیکھ کر خوشی ہوئی جو اپنے شہداء کو خراج عقیدت پیش کرنے اور اپنی افواج پاکستان کی عظیم قربانیوں کو یاد کرنے اور آپریشن بنیان مرصوص کی فتح کا جشن منانے آئے ہیں۔ انہوں نے کہا کہ ان بچوں کا جذبہ، حوصلہ اور ہمت دیکھ کر یقین ہو گیا ہے کہ اللہ تعالیٰ نے جس طرح آپریشن بنیان مرصوص اور معرکہ حق میں ہمیں فتح عطا فرمائی، اسی طرح پاکستان کا مستقبل بھی محفوظ ہاتھوں میں ہے۔ وفاقی وزیر اطلاعات نے کہا کہ پاکستان کو مملکت خداداد اس لئے کہا جاتا ہے کہ یہ اللہ تعالیٰ کا انعام اور اس کی عظیم نعمت ہے۔ انہوں نے کہا کہ ہمارے بزرگوں نے بے شمار قربانیوں کے بعد یہ ملک حاصل کیا اور برصغیر کے مسلمانوں کا دیرینہ مطالبہ پورا ہوا۔ انہوں نے کہا کہ جو خواب علامہ محمد اقبال نے دیکھا تھا، اسے قائداعظم محمد علی جناح نے عملی جامہ پہنایا اور آج ہم آزاد فضاؤں میں سانس لے رہے ہیں۔
انہوں نے کہا کہ ہمارے دشمن کو ہر کچھ عرصے بعد ہماری یہ آزادی کھٹکتی ہے اسی لئے وہ مسلسل اس تاک میں رہتا ہے کہ پاکستان کے خلاف کس طرح سازش کی جائے اور اسے کیسے نقصان پہنچایا جائے۔ انہوں نے کہا کہ پچھلے سال مئی میں جب پہلگام کا فالس فلیگ آپریشن کیا گیا تو پاکستان نے نہایت واضح اور دوٹوک موقف اختیار کیا اور پوری دنیا کو بتایا کہ ہم اس واقعہ کی تحقیقات کے لئے تیار ہیں۔ انہوں نے کہا کہ پاکستان چاہتا ہے کہ اس معاملے کی آزادانہ اور منصفانہ انکوائری ہو تاکہ دودھ کا دودھ اور پانی کا پانی ہو سکے۔ انہوں نے کہا کہ پاکستان دہشت گردی کا مقابلہ کرنے والے ممالک میں جبکہ بھارت دہشت گردی کو فروغ دینے والے ممالک میں شامل ہے، پاکستان اور بھارت دو مختلف سمتوں پر کھڑے ہیں۔
پاکستانی قوم کا ہر طبقہ دہشت گردوں کے خلاف لڑتے ہوئے قربانیاں دے رہا ہے جبکہ بھارت دہشت گردوں کی سرپرستی کر رہا ہے اور دنیا آج اس حقیقت کو تسلیم کرتی ہے۔ انہوں نے کہا کہ پہلگام فالس فلیگ آپریشن کی تحقیقات کے حوالے سے وزیراعظم شہباز شریف کا واضح وژن تھا، اللہ تعالیٰ نے قوم کو معرکہ حق میں شاندار فتح نصیب فرمائی۔ انہوں نے کہا کہ چیف آف ڈیفنس فورسز فیلڈ مارشل سید عاصم منیر نے جس انداز میں جنگ حکمت عملی مرتب کی اس کے تحت پاکستان نے نہ صرف اپنا موثر دفاع کیا بلکہ بھارت کے متعدد جہاز بھی گرائے جو ملبے کا ڈھیر بن گئے۔
انہوں نے کہا کہ پوری دنیا نے دیکھا کہ جب فتح میزائل دشمن کی دفاعی تنصیبات پر گرا تو چند گھنٹوں کے اندر ٹی وی سکرین پر بیٹھ کر بڑے بڑے دعوے کرنے والے بھارتی نمائندوں کے چہرے مرجھا گئے۔ چند گھنٹوں میں ہی بھارت گھٹنے ٹیکنے پر مجبور ہوا اور کہا کہ ہم جنگ نہیں چاہتے، اگر جنگ نہیں چاہتے تھے تو حملہ کیوں کیا تھا؟ ان کے ٹی وی پر بیٹھے لوگ بوکھلاہٹ میں جھوٹ بولتے تھے کہ ہم نے لاہور اور ملتان کی بندرگاہیں تباہ کر دیں۔
انہوں نے کہا کہ ان کی سازش بری طرح ناکام ہوئی، اللہ تعالیٰ نے پاکستان کو جنگی محاذ سمیت بیانیہ اور سفارتی محاذوں پر بھی فتح عطا فرمائی جس کو تاقیامت یاد رکھا جائے گا۔ انہوں نے کہا کہ پاکستانی قوم ایک جری اور بہادر قوم ہے، پوری قوم اپنی افواج کے پیچھے سیسہ پلائی دیوار کی طرح کھڑی ہے۔ انہوں نے کہا کہ پوری قوم نے اپنی فوج کے ہمراہ بنیان مرصوص بن کر دکھایا جس کی بدولت اللہ تعالیٰ نے پاکستان کو فتح نصیب فرمائی۔ وفاقی وزیر اطلاعات نے اس موقع پر علامہ اقبال کے چند اشعار بھی پڑھے۔
”یہ غازی یہ تیرے پر اسرار بندے
جنہیں تو نے بخشا ہے ذوق خدائی
دو نیم ان کی ٹھوکر سے صحرا و دریا
سمٹ کر پہاڑ ان کی ہیبت سے رائی
دو عالم سے کرتی ہے بیگانہ دل کو
عجب چیز ہے لذت آشنائی
شہادت ہے مطلوب و مقصود مومن
نہ مال غنیمت نہ کشور کشائی“
قبل ازیں تقریب کا آغاز قومی ترانے سے ہوا جبکہ قاری عطاء الرحمان نے تلاوت کلام پاک کے فرائض انجام دیئے۔ اس موقع پر وفاقی وزیر اطلاعات عطاء اللہ تارڑ اور سیکریٹری اطلاعات و نشریات اشفاق احمد خلیل بچوں کے ہمراہ کینڈل لائیٹ ویجل میں بھی شامل ہوئے۔
