ویتنام نے 2030 تک ملک کے فضائی نقل و حمل کے نیٹ ورک کو وسعت دینے اور سفر کی بڑھتی ہوئی طلب کو پورا کرنے کے لیے سات نئے ہوائی اڈوں کو فعال بنانے کے منصوبے کا اعلان کیا ہے ۔ شنہوا کے مطابق ان میں دو بڑے ہوائی اڈے، جنوبی شہر ڈونگ نائی میں لانگ تھانہ بین الاقوامی ہوائی اڈہ اور شمالی صوبے باک نِنہ میں جیا بِنہ بین الاقوامی ہوائی اڈہ شامل ہیں۔
دیگر پانچ ہوائی اڈوں میں وسطی صوبہ کوانگ تری میں کوانگ تری ہوائی اڈہ، وسطی صوبہ لام ڈونگ میں فان تھیئت ہوائی اڈہ، شمالی صوبہ لاؤ کائی میں سا پا ہوائی اڈہ، میکونگ ڈیلٹا کے صوبہ آن جیانگ میں تھو چو ہوائی اڈہ اور وسطی صوبہ خانہ ہوا میں تھانہ سون ہوائی اڈہ شامل ہیں۔وزارت تعمیرات کی رپورٹ کے مطابق دہائی کے اختتام تک ویتنام میں مجموعی طور پر 32 ہوائی اڈے فعال ہوں گے، جن میں 15 بین الاقوامی اور 17 اندرونِ ملک پروازوں کے لیے مختص ہوں گے۔
ان ہوائی اڈوں کی مجموعی سالانہ استعداد 22 کروڑ مسافروں تک پہنچ جائے گی۔رپورٹ کے مطابق 2021 تا 2030 کے دوران ہوائی اڈوں کی ترقی کے لیے مجموعی سرمایہ کاری کا تخمینہ تقریباً 19.3 بلین امریکی ڈالر لگایا گیا ہے، جس میں سے تقریباً 55 فیصد سرمایہ ریاستی فنڈز سے فراہم کیے جانے کی توقع ہے۔
