صوبائی وزیر خزانہ مجتبی شجاع الرحمن نے کہا ہے کہ زراعت، لائیو اسٹاک اور آبی زراعت پنجاب کی معیشت ، غذائی تحفظ ، دیہی روزگار اور برآمدات کے فروغ کے بنیادی ستون ہیں،ان شعبوں کی استعداد کار کو بروئے کار لانے اور انہیں معاشی ترقی کے محرک میں تبدیل کرنے کے لیے حکومت پنجاب نے آئندہ مالی سال میں ترقیاتی و غیر ترقیاتی اخراجات کی مد میں 132 ارب 54 کروڑ روپے مختص کیے ہیں جبکہ آئندہ آنے والے 3 سالوں میں حکومت کے اکنامک ٹرانسفارمیشن اقدامات کے تحت زرعی ویلیوایڈیشن
لائیو اسٹاک ویلیو اسٹریم اور آبی زراعت کے شعبوں میں حکومتی سرمایہ کاری تقریبا 481 ارب روپے ہوگی ، جس کے نتیجے میں نجی شعبے کی جانب سے 134 ارب روپے کی اضافی سرمایہ کاری متوقع ہے،انہوں نے کہا کہ ان شعبوں میں مجموعی سرمایہ کاری کا حجم 615 ارب روپے سے تجاوز کر جائے گا،اس سرمایہ کاری کے ذریعے پیداوار ،ویلیو ایڈیشن، برآمدات، روز گار اور دیہی خوشحالی کے نئے مواقع پیدا کیے جائیں گے ۔
