گلگت بلتستان اسمبلی کے نومنتخب 4آزاد ارکان نے استحکام پاکستان پارٹی (آئی پی پی) میں شمولیت کا اعلان کر دیا ہے۔ اس حوالے سے فیصلہ منگل کے روز گلگت میں آئی پی پی کے صدر اور وفاقی وزیر عبدالعلیم خان سے ملاقات کے بعد کیا گیا۔پارٹی میں شامل ہونے والے ارکان میں حلقہ GBA-23 گانچھے-II سے منتخب ہونے والے انور علی، حلقہ GBA-24 گانچھے-III سے ڈاکٹر اسد شفیق، حلقہ GBA-15 دیامر-I سے محمد دلپذیر اور حلقہ GBA-21 یاسین سے امان علی امیر شامل ہیں۔ان ارکان کی شمولیت کو گلگت بلتستان میں حکومت سازی کے عمل اور جاری سیاسی مشاورت کے تناظر میں اہم پیش رفت قرار دیا جا رہا ہے۔
مختلف سیاسی جماعتیں حکومت کی تشکیل کے لیے اپنی پوزیشن مضبوط بنانے اور ممکنہ اتحاد قائم کرنے کی کوششوں میں مصروف ہیں۔واضح رہے کہ استحکام پاکستان پارٹی نے عام انتخابات میں متعدد حلقوں سے امیدوار میدان میں اتارے تھے، تاہم پارٹی کوئی نشست جیتنے میں کامیاب نہیں ہو سکی تھی۔ چار آزاد ارکان کی شمولیت کے بعد آئی پی پی کو نو منتخب اسمبلی میں نمائندگی حاصل ہو گئی ہے، جس سے آئندہ دنوں میں سیاسی مذاکرات اور حکومت سازی کے عمل پر اثرات مرتب ہونے کا امکان ہے۔
