اسلام آباد مفاہمتی یادداشت فریقین کے درمیان حتمی معاہدے تک پہنچنے کے لیے روڈ میپ پر اتفاق ،مشترکہ اعلامیہ جاری
اسلام آباد مفاہمتی یادداشت کے تحت امریکااور ایران کے درمیان اعلیٰ سطح کے تکنیکی مذاکرات کا پہلا سیشن سوئٹزرلینڈ کے شہر برگن سٹاک میں اختتام پذیر ہو گیا،لیک لوسرن سمٹ مثبت اور تعمیری ماحول میں ہوئی جس میں حوصلہ افزا پیش رفت سامنے آئی،مفاہمتی یادداشت کی بنیاد پر فریقین نے اعلیٰ سطح کی کمیٹی کے قیام پر اتفاق کیاجو ثالثی عمل کی سیاسی نگرانی کرے گی، چیف مذاکرات کار باقاعدگی سے اس کمیٹی کو رپورٹ پیش کریں گے،کسی بھی ناخوشگوار واقعے یا غلط فہمی سے بچنے کے لیے فریقین کے درمیان رابطہ لائن قائم کر دی گئی۔پیر کو لیک لوسرن سمٹ اور امریکا اور ایران کی شرکت کے ساتھ منعقدہ پہلی اعلیٰ سطح کی کمیٹی کے اجلاس کے اختتام پر پاکستان اور قطر کی طرف سے جاری مشترکہ اعلامیہ کے مطابق اسلام آباد مفاہمتی یادداشت کے تحت اعلیٰ سطح کے مذاکرات کا پہلا اجلاس سوئٹزرلینڈ کے شہر برگن سٹاک میں اختتام پذیر ہو گیاجس میں ایران، امریکا اور ثالثی کرنے والے دو ممالک، قطر اورپاکستان کے نمائندوں نے شرکت کی۔لیک لوسرن سمٹ مثبت اور تعمیری ماحول میں منعقد ہوئی جس کے دوران حوصلہ افزا پیش رفت سامنے آئی جن میں مزید تکنیکی مذاکرات کے لیے ایک طریقہ کار (میکانزم) کا قیام بھی شامل ہے۔
مفاہمتی یادداشت کی بنیاد پر فریقین نے ایک اعلیٰ سطح کی کمیٹی کے قیام پر اتفاق کیاجو ثالثی عمل کی سیاسی نگرانی کرے گی۔ چیف مذاکرات کار باقاعدگی سے اس کمیٹی کو رپورٹ پیش کریں گے اور جوہری امور، پابندیوں، نگرانی اور تنازعات کے حل سے متعلق ورکنگ گروپس کی قیادت کریں گے تاکہ مفاہمتی یادداشت پر مؤثر عمل درآمد یقینی بنایا جا سکے۔اعلیٰ سطح کی کمیٹی نے آئندہ 60 دن کے اندر حتمی معاہدے تک پہنچنے کے لیے ایک روڈ میپ پر اتفاق کیاجس کے تحت مزید تکنیکی مذاکرات فوری طور پر شروع کیے جائیں گے۔اس کے علاوہ مفاہمتی یادداشت کے پیراگراف 5 میں بیان کردہ مدت کے دوران کسی بھی ناخوشگوار واقعے یا غلط فہمی سے بچنے کے لیے فریقین کے درمیان ایک رابطہ لائن قائم کی گئی ہےجس کا مقصد آبنائے ہرمز کے ذریعے تجارتی جہازوں کی محفوظ آمد و رفت کو یقینی بنانا ہے۔
مزید برآں فریقین نے ثالثی کرنے والے ممالک کی سہولت کاری سے اپنے درمیان اورلبنان کے ساتھ ایک ڈی کنفلکشن سیل قائم کرنے پر بھی اتفاق کیا ہےتاکہ مفاہمتی یادداشت کے مطابق لبنان میں فوجی کارروائیوں کے خاتمے پر عمل درآمد یقینی بنایا جا سکے۔تمام امور پر تکنیکی مذاکرات ہفتے کے بقیہ دنوں میں برگن سٹاک ریزارٹ میں جاری رہیں گے۔ثالثی کرنے والے ممالک اس امر کو یقینی بنانے کے لیے اپنی بھرپور کوششیں جاری رکھیں گے کہ مذاکرات تعمیری ماحول میں آگے بڑھتے رہیں اور ایک حتمی معاہدے تک پہنچا جا سکے۔اعلامیہ کے مطابق قطر اور پاکستان، امریکا اور ایران کی جانب سے سفارت کاری اور تنازع کے پرامن حل کے لیے مسلسل وابستگی کو سراہا گیا ہے اور جاری مذاکرات میں برادر اور دوست ممالک کی مسلسل حمایت اور قیمتی تعاون پر ان کا شکریہ ادا کیا گیا ہے۔
