رپورٹ : شکیلہ جلیل
نویں او آئی سی وزارتی کانفرنس برائے خواتین میں شرکت کے لیے رکن ممالک کے وفود پاکستان پہنچنا شروع ہوگئے ہیں۔ دو روزہ کانفرنس 12 اور 13 جولائی کو منعقد ہوگی جس کی میزبانی پاکستان کر رہا ہے۔
کانفرنس میں او آئی سی ممالک کے وزراء، اعلیٰ حکام اور بین الاقوامی تنظیموں کے نمائندگان شرکت کریں گے، جہاں خواتین کے سماجی، معاشی اور سیاسی استحکام سے متعلق اہم امور پر تبادلہ خیال کیا جائے گا۔
معزز وفود کا استقبال وزیر مملکت بیرسٹر عقیل ملک، صبا صادق، فرح ناز اکبر اور دیگر اعلیٰ حکام نے کیا۔ پاکستان کو اس اہم کانفرنس کی میزبانی کا اعزاز حاصل ہے اور اس موقع پر خواتین کے حقوق، وقار اور بااختیار بنانے کے عزم کا اعادہ کیا جائے گا۔
وزیر قانون اعظم نذیر تارڑ کانفرنس کے چیئرمین کی ذمہ داریاں انجام دیں گے جبکہ پاکستان صدارت کرتے ہوئے رکن ممالک کے درمیان تعاون کو مزید فروغ دے گا۔
کانفرنس کے دوران خواتین کی ترقی سے متعلق پیش رفت، بہترین قومی تجربات کا جائزہ لیا جائے گا اور مشترکہ تعاون کے لیے آئندہ کا لائحۂ عمل بھی مرتب کیا جائے گا۔ حکومت پاکستان نے تمام معزز وفود کا پرتپاک خیرمقدم کیا ہے۔
